ပိုၼ်းၸဝ်ႈၼၢင်းႁိူၼ်းၶမ်း၊ တွၼ်ႈ (႘) တႄႇၼႃႈႁေႃတေႃႁိူၼ်း

 (႘) တႄႇၼႃႈႁေႃတေႃႁိူၼ်း 

တႃႇတေၵိုတ်းယင်ႉ ပၢင်ၵူပ်ႉၵူႈသွၼ်ႉမိင်ႈၼၼ်ႉ ၸဝ်ႈႁိူၼ်းၶမ်း မီးၶၢဝ်းယၢမ်း ၼိုင်ႈပီႊ။ ၼႂ်းၶၢဝ်းယၢမ်းၼိုင်ႈပီႊၼႆႉ ၸဝ်ႈႁိူၼ်းၶမ်း ႁႆႈႁႆႈပဵၼ်လၢႆၵမ်းၵေႃႈ ဢမ်ႇႁူႉယဝ်ႉ။ ၵူၺ်းၵႃႈ ၸဝ်ႈႁိူၼ်းၶမ်း ဢမ်ႇၵႂႃႇတွပ်ႇထဵင် ၸဝ်ႈပီႈၾႃႉမၼ်း ႁၢဝ်ႈႁၢဝ်ႈႁႅင်းႁႅင်း။ ၵူၼ်းၸၢႆးၵေႃႉဢၼ် ၸဝ်ႈႁိူၼ်းၶမ်း တေလႆႈဢဝ်ႁဵတ်းၽူဝ်ၼၼ်ႉ ဢႃႇယုမၼ်း ယႂ်ႇလိူဝ် ၸဝ်ႈႁိူၼ်းၶမ်း သၢဝ်းပီႊ။ ၵူၼ်းၸၢႆးၵေႃႉၼၼ်ႉ ယၢမ်ႈမၢႆႈသွင်ပွၵ်ႈယဝ်ႉသေမဝ်ႇၵႃး မိူဝ်ႈလဵဝ်ၵေႃႈ တိုၵ်ႉမီး မေးၵေႃႉ႞။ မီးလုၵ်ႈလၢင်း ၸိူဝ်းဢႃႇယုယႂ်ႇထူၼ်ႈယဝ်ႉၵွၼ်ႇ။ ၸဝ်ႈႁိူၼ်းၶမ်းၼႆႉ လိူၼ်မေႇ တေမႃးၼႆႉၸင်ႇ တေတဵမ်ဢႃႇယု သၢဝ်းပီႊ။ ပေႃးဢဝ်ပိူၼ်ႈဝႃႈတႄႉ ဢႃႇယုမၼ်းယႂ်ႇၼႃႇယဝ်ႉ။ ပေႃးဢဝ်ၸႂ်မၼ်းဝႃႈတႄႉ ဢႃႇယုမၼ်း တိုၵ်ႉလဵၵ်ႉယူႇ။ တေဢဝ်ၵူၼ်းၸၢႆးၵေႃႉဢႃႇယုသီႇသိပ်း ဢၼ်ပဵၼ်ဢူၺ်းၵေႃႉၵၼ်တင်း ပီႈဢၢႆႈမၼ်းၼႆႉ လီတိုၼ်ႇလီၽၢၼ်ႈၼႃႇ။ ၸဝ်ႈႁိူၼ်းၶမ်းဝူၼ်ႉဝႃႈ ၸၢတ်ႈၵဝ်ႇမၼ်း ယၢမ်ႈႁဵတ်းၽိတ်းသင်မႃးလႄႈ ၸၢတ်ႈၼႆႉ လႆႈမႃးၺႃးၸိူင်ႉၼႆ ၼႆယဝ်ႉ။ ဢၼ်တိူဝ်းသုၵ်ႉသၢၵ်ႉၵႂႃႇၼၼ်ႉသမ်ႉ မီးထႅင်ႈလွင်ႈ႞။ ၵူၼ်းၼုမ်ႇ တၢင်းၵဵင်းတုင် ဢမ်ႇမုင်ႈဢမ်ႇမွင်းသေ မႃးယွၼ်းႁၵ်ႉမၼ်းဝႃႇ။ ၵူၼ်းၼုမ်ႇၵေႃႉၼၼ်ႉ ပဵၼ်လုၵ်ႈဢွၼ်ႇၸၢႆး ၵေႃႉဢၼ်ပဵၼ် ပီႈၼွင်ႉ ၽၢႆႇၸဝ်ႈဝႅၼ်းတိပ်ႉ ၵေႃႉဢၼ်ၵႆႉမႃးယဝ်ႉယွၵ်ႇ ၸဝ်ႈႁိူၼ်းၶမ်း မိူဝ်ႈၶၢဝ်းဢိုတ်းႁဵၼ်းၼၼ်ႉယဝ်ႉ။ ၼႆလႄႈ ၸဝ်ႈႁိူၼ်းၶမ်း ယွၼ်းၼွမ်းတွင်းပၢၼ် ၸဝ်ႈပီႈၾႃႉမၼ်း တႃႇတေလႆႈဢဝ်ၵၼ်တင်း ၵေႃႉၼၼ်ႉ။ ပေႃးယူႇတီႈၵူၼ်းလူင်ၶဝ် တူၺ်းၼႆၸိုင် ဢမ်ႇမီးလွင်ႈတေထဵင်ပႅတ်ႈ ၵေႃႉၼၼ်ႉသေဢိတ်း။ ၵူၺ်းၵႃႈ တူၵ်းလိုၼ်းၵႂႃႇတေႉယဝ်ႉ။ သွင်ပႃႈသွင်ၽၢႆႇ လႆႈႁပ်ႉပၢၵ်ႇၵၼ်ဝႆႉယဝ်ႉသေ ၶပ်ႉၶိုင်ႁၢင်ႈႁႅၼ်းၵၼ်ယဝ်ႉမူတ်းယဝ်ႉ။ 

ဢမ်ႇႁိုင်သင် ၶၢဝ်ႇမၼ်းႁူင် တင်းမၢၼ်ႈတင်းမိူင်းဝႃႈ ၸဝ်ႈယိင်းဢွၼ်ႇ တီႈႁေႃသႅၼ်ဝီၼၼ်ႉ ၶီၶီငဝ်ငဝ်ဝႆႉဝႃႇ။ မၢင်ၵေႃႉယင်းလၢတ်ႈဝႃႈ တူဝ်ၸဝ်ႈယိင်းဢွၼ်ႇၼၼ်ႉ ယူႇၼိူဝ်ၶူဝ်လႆ ဝႅၼ်တူၵ်းဝႃႇ။ ၵူၺ်းၵႃႈ ၵႂႃႇတူၵ်းသႂ်ႇၼိူဝ် တၢၼ်းသိူဝ်း ၸႃႉၶိုၵ်ႉလႄႈ ဢမ်ႇပဵၼ်သင်ဝႃႈ။ ၵႂၢမ်းၵၢင်လၢႆၸိူဝ်းၼၼ်ႉ ထိုင်ၵႂႃႇတၢင်းယွင်ႁူၺ်ႈၵွၼ်ႇယဝ်ႉ။ ၵူၺ်းၵႃႈ ၸဝ်ႈသူၺ်ႇတႅၵ်ႈတႄႉ လၢတ်ႈဝႃႈ တိုၼ်းတေဢမ်ႇႁူၼ်လင် ၼႆယဝ်ႉ။

ၵွပ်ႈသင် မၼ်းဢမ်ႇႁူၼ်လင်။ လၢႆးမၼ်းလိူၵ်ႈဢဝ်မေးၼၼ်ႉ ၵဵဝ်ႇၵွင်ႉၵၼ်ဝႆႉတင်း ပိုၼ်းမၼ်းဢၼ်လႆႈလတ်းၽၢၼ်ႇမၼ်း တႃႇတေပဵၼ်ၸဝ်ႈၾႃႉ။ မိူဝ်ႈမၼ်းၶိုၼ်ႈပဵၼ်ၸဝ်ႈၾႃႉၼၼ်ႉ မၼ်းဢဝ် ၼၢင်းယိင်း တီႈယွင်ႁူၺ်ႈ သွင်ပီႈၼွင်ႉ။ မေးတီႈသၢမ်မၼ်းတႄႉ ပဵၼ်ၼၢင်းယိင်းဢွၼ်ႇ ၶိူဝ်းၸၼ်ႉထၢၼ်ႈသုင် တီႈပၢင်ႇဢူး ၵေႃႉဢၼ်မၼ်းလႆႈႁူပ်ႉထူပ်းမႃး မိူဝ်ႈမၼ်းႁၢပ်ႇၵၢၼ်သိုၵ်း။ မေးၵေႃႉၼႆႉတႄႉ ၸဝ်ႈၾႃႉ လႆႈဢဝ်ဝႆႉ တီႈႁိူၼ်းလင်႞ ၼႂ်းဝဵင်းၵွႆး။ မေးတၢင်ႇၵေႃႉ ဢမ်ႇၽွမ်ႉ တႃႇတေႁွင်ႉၶဝ်ႈမႃးၼႂ်းႁေႃ။ မေး ၵေႃႉဢၼ် လုၵ်ႉပၢင်ႇဢူးဢဝ်မႃးၼၼ်ႉ တၢႆၵႂႃႇၸဝ်ႉၸဝ်ႉ။ ၵိုတ်းဝႆႉ လုၵ်ႈၸၢႆးၵေႃႉ႞သေတႃႉ တၢႆၵႂႃႇထႅင်ႈ မိူဝ်ႈဢႃႇယု တိုၵ်ႉလႆႈ သိပ်းပီႊပၢႆ။ မေးမၼ်း သွင်ပီႈၼွင်ႉၵေႃႈ တၢႆၵႂႃႇထႅင်ႈ။ ပိူၼ်ႈဝႃႈတႄႉ ယွၼ်ႉတၢင်းပဵၼ်ပွတ်ႇၸဵပ်းဝႃႈၼႆ။ တီႈၶႃပီႈၼွင်ႉၼၼ်ႉ ၵိုတ်းဝႆႉ လုၵ်ႈလၢင်းသၢမ်ၵေႃႉ။ 

ၸဝ်ႈႁိူၼ်းၶမ်း လႄႈ ၸဝ်ႈသူၺ်ႇတႅၵ်ႈ မိူဝ်ႈဝၼ်းၵူပ်ႉၵူႈသွၼ်ႉမိင်ႈ မိူဝ်ႈပီႊ ၁၉၃၈

မိူဝ်ႈမေးမၼ်း တၢႆတင်းသၢမ်ၵေႃႉယဝ်ႉၼၼ်ႉ ၼႂ်းမိူင်းၼႆႉ ႁူင်ၵၼ်လၢတ်ႈဝႃႈ ၼၢင်းယိင်း ၸိူဝ်းၼၼ်ႉ ဢမ်ႇထိူၵ်ႈယူႇ ၼႂ်းႁေႃၸဵတ်းယွတ်ႈ ဢၼ်ၸဝ်ႈလုင်း ၸဝ်ႈသူၺ်ႇတႅၵ်ႈၶဝ် ၵေႃႇသၢင်ႈဝႆႉၼၼ်ႉလႄႈ ၸင်ႇတၢႆၵၼ် ၸဝ်ႉၸဝ်ႉၼႆယဝ်ႉ။

ဝၢႆးလင်ၼၼ်ႉ ၸဝ်ႈသူၺ်ႇတႅၵ်ႈ ဢဝ်ထႅင်ႈ မေးၵေႃႉ႞။ ပဵၼ်ၼွင်ႉယိင်း မေးမၼ်းသွင်ပီႈၼွင်ႉ ဢၼ်တၢႆၵႂႃႇယဝ်ႉၼၼ်ႉၵွႆး။ မိူဝ်ႈၼၼ်ႉ ၵႂၢမ်းသွပ်ႉသႅပ်ႉ လၢတ်ႈတေႃႇၵၼ်ၼၼ်ႉ တိူဝ်းၼမ်မႃးတိၵ်းတိၵ်း။ ၵူၼ်းတင်းၼမ် လၢတ်ႈၵၼ်ဝႃႈ တၢမ်တူဝ် ၸဝ်ႈသူၺ်ႇတႅၵ်ႈၵေႃႈ ပဵၼ်လၢၼ်ၸၢႆးဢွၼ်ႇ ဢၼ်ၸၼ်ႉထၢၼ်ႈတႅမ်ႇၵွႆး။ မေးမၼ်းၸိူဝ်းၼၼ်ႉၵေႃႈ ပဵၼ်ၵူၼ်းမိူင်း ၵျွင်းဢူးၽႃးၵႃႇၵွႆး။ ၵွပ်ႈၼႆ ၶဝ်ဢမ်ႇမီးၽုင်းမီးၵၢမ်ႇ တႃႇတေယူႇ ၼႂ်းႁၢင်ႈၼႂ်းႁေႃ ၼႆယဝ်ႉ။ 

ၸဝ်ႈသူၺ်ႇတႅၵ်ႈတႄႉ ဢမ်ႇယုမ်ႇယမ် လွင်ႈတၢင်းၸိူဝ်းဢမ်ႇလႆႈႁၼ်ၼၼ်ႉ။ ၵူၺ်းၵႃႈ မၼ်းႁၼ်ထိုင် လွင်ႈၵၢၼ်မၢၼ်ႈၵၢၼ်မိူင်း။ ၼင်ႇႁိုဝ် ၶႃႈမၢၼ်ႈၵူၼ်းမိူင်းမၼ်း တေၼပ်ႉယမ်မၼ်းၼႆႉ တၵ်းတေလႆႈဢဝ် လုၵ်ႈၸဝ်ႈလုၵ်ႈၶုၼ် ၵေႃႉ႞ယူႇယဝ်ႉ။ ၵေႃႉဢၼ်မၼ်းႁႃႁၼ်ၼၼ်ႉတႄႉ မိူၼ်တင်း ၸဝ်ႈယိင်းဢွၼ်ႇ တေႁဵတ်းႁႂ်ႈမၼ်း ၸဵပ်းသႅပ်ႇယဝ်ႉ။ မၼ်းဢမ်ႇလႅၼ်ႈပၢႆႈ။ ဢမ်ႇလၢတ်ႈဝႃႈ မၼ်းမီးၸူႉမီးၸူဝ်း။ ၵူၺ်းၵႃႈ လၢႆးမၼ်းတုမ်ႉတွပ်ႇၶိုၼ်းၼႆႉ လီၸႂ်ၶူမ်းလိတ်းလိတ်းဝႆႉယူႇ။ ၸဝ်ႈယိင်းဢွၼ်ႇၼၼ်ႉ တေႃႇၼႃႈ ၵူၼ်းလူင်ၶဝ်သေ လၢတ်ႈဢွၵ်ႇမႃးၶေႃႈလဵဝ်ၵွႆး “ၶႃႈဢမ်ႇၶႂ်ႈဢဝ်မၼ်း” ၼႆယဝ်ႉ။ 

ၸဝ်ႈၾႃႉယွင်ႁူၺ်ႈ ႁၼ်ထိုင်ဝႃႈ ပေႃးႁဵတ်းၼႆတႄႉ မၼ်းတေဢမ်ႇၸၢင်ႊဢဝ် ၸဝ်ႈယိင်းဢွၼ်ႇၼၼ်ႉယဝ်ႉ။ မၼ်းဝူၼ်ႉဝႃႈ တႃႇတေဢဝ်လိူင်ႈၼႆႉ တၢင်ႇထိုင် လုမ်းတတ်းသိၼ် ဢိင်းၵလဵတ်ႈၶဝ်။ ဢိင်းၵလဵတ်ႈၶဝ် မီးၾိင်ႈမိူင်း ၼမ်ၼႃႇ။ ဢၢၼ်းမၢပ်ႇတင်း လိူင်ႈယႃႉၶေႃႈၵႂၢမ်းႁပ်ႉပၢၵ်ႇ ၼႆယဝ်ႉ။ ၽူႈတတ်းသိၼ်လူင် တီႈဝဵင်းတွင်ၵီႈတႄႉ ပၼ်တၢင်းၶႆႈၸႂ်တီႈၸဝ်ႈၾႃႉဝႃႈ ၸဝ်ႈယိင်းဢွၼ်ႇၼၼ်ႉ တဵမ်ဢႃႇယု တႃႇတေတႅပ်းတတ်းလႆႈ ႁင်းၵွႆးမၼ်းယဝ်ႉၼႆ။ 

ၸဝ်ႈသူၺ်ႇတႅၵ်ႈ လႆႈဝူၼ်ႉၶိုၼ်းဝႃႈ ၸွင်ႇမၼ်းမီး သဵၼ်ႈတၢင်း တႃႇတေထွႆလင်ၶိုၼ်းၼႆ။ မေး ၵေႃႉဢၼ် ဢမ်ႇၶႂ်ႈလႆႈမၼ်း၊ ၵေႃႉဢၼ်ႁူဝ်ၶႅင်ၼၼ်ႉ တေမႃးပၼ် တၢင်းယၢပ်ႇတီႈမၼ်း လၢႆလၢႆ ဢမ်ႇၸႂ်ႈႁိုဝ်။ မိူဝ်ႈလဵဝ် တင်းမၢၼ်ႈတင်းမိူင်း ဢွၼ်ၵၼ်ပႂ်ႉတူၺ်း ၶႃသွင်ၵေႃႉဝႃႈ ၽႂ်တေပေႉ ၼႆယဝ်ႉ။ 

ၸဝ်ႈႁိူၼ်းၶမ်း ပၢၵ်ႈထဵင်ပႅတ်ႈ ၸိူင်ႉၼႆၼႆႉ လႆႈတၢင်းဢၢႆတေႉၼင်ႇၵဝ်ႇ။ ၵူၺ်းၵႃႈ ပိူဝ်ႈတႃႇ ၵူၼ်းၶႂ်ႈႁဵတ်းသြႃႇလူင်ၶဝ်၊ ၵူၼ်းၼႂ်းၵၢတ်ႇၶဝ် လၢတ်ႈၸွမ်းၼၼ်ႉ ဢွၵ်ႇမႃးလွင်ႈတၢင်းမႂ်ႇ ဢၼ်႞လႄႈ ၸဝ်ႈသူၺ်ႇတႅၵ်ႈၵေႃႈ ၵၢမ်ႇလီၵႂႃႇဢိတ်း႞။ ပီႊ ၁၉၃၇ ၼၼ်ႉ ပဵၼ်ပီႊဢၼ်ၵၢၼ်မိူင်း တူင်ႉတူင်ႉၼိုင်ၼိုင်။ မိူင်းမၢၼ်ႊၵေႃႈ လုၵ်ႉတီႈပၢၼ်ၸေႊမိူင်း ဢၼ်ပႃး ၼႂ်းမိူင်းဢိၼ်းတီးယႃးသေ လႅၵ်ႈလၢႆႈပဵၼ်မႃး မိူင်းႁင်းၶေႃ ဢၼ်ယူႇတႂ်ႈႁေႃၶမ်းဢိင်းၵလဵတ်ႈ ၵမ်းသိုဝ်ႈ။ 

ၸိူဝ်းဢၼ်ဢွၼ်ႁူဝ် တူင်ႉၼိုင်ၼၼ်ႉ ပဵၼ်လုၵ်ႈႁဵၼ်း ၸၼ်ႉၸွမ်ယၼ်ႇၵုင်ႇၶဝ်ယဝ်ႉ။ ၸုမ်းလုၵ်ႈႁဵၼ်းၸိူဝ်းၼႆႉ ၶိုၼ်းႁွင်ႉတူဝ်ၵဝ်ႇၶဝ် ဝႃႈ တၶိၼ်ႇ (ပွင်ႇဝႃႈ ၸဝ်ႈ)။ မိူဝ်ႈၸဝ်ႉၼၼ်ႉ ပဵၼ်ၶေႃႈၵႂၢမ်း ဢၼ်လႆႈႁွင်ႉတေႃႇ ဢိင်းၵလဵတ်ႈၶဝ်ၵွႆး။ ၶေႃႈၵႂၢမ်းဢၼ်သၢႆႉၶႂႃၵၼ်တင်း တၶိၼ်ႇ (ၸဝ်ႈ) ၼၼ်ႉ ပဵၼ် ၵျုၼ်ႇ (ၶႃႈ) ၼၼ်ႉၼႃႇ။ ၼႂ်းၵၢၼ်တူင်ႉၼိုင် ၸုမ်းတၶိၼ်ႇၶဝ်ၼၼ်ႉ ဢွင်ႇသၢၼ်း ပဵၼ်ႁူဝ်ၼႃႈ။ ပဵၼ်ၽူႈထတ်းလိၵ်ႈ ၽိုၼ်လိၵ်ႈ ဢူဝ်းဝေႇ ဢၼ်လုၵ်ႈႁဵၼ်းၶဝ် ၶပ်ႉၶိုင်ပိုၼ်ဢွၵ်ႇ။ မၼ်းသူင်ၼုင်ႈ သိူဝ်ႈၶူဝ်းမၢၼ်ႊ။ မၼ်း လႄႈ ၵူၼ်းမၼ်း ဢွၼ်ၵၼ်တိုဝ်း ၶႅပ်းတိၼ်မႆႉသေ ပႆၼိူဝ်သဵၼ်ႈတၢင်း မေႃးလင်ၵူၵ်းၵၢၵ်း ။ ၵူၼ်းႁဵတ်းၵၢၼ်ၶဝ်လႂ်၊ ၵူၼ်းၶၢႆၶူဝ်းၶဝ်လႂ် ၵမ်ႉထႅမ် လၢႆးႁဵတ်းသၢင်ႈၶဝ်တေႉတေႉ။ ၼႆႉပဵၼ် လွင်ႈတၢင်းဢၼ် ၵူၼ်းမိူင်းၽႃးၵႃႇၶဝ် သူၼ်ၸႂ်မႃး ၼႂ်းၵၢၼ်ပၢႆးမိူင်း ပၢၼ်မႂ်ႇ ၵမ်းဢွၼ်သုတ်းယူႇယဝ်ႉ။ ၽိုၼ်လိၵ်ႈ ဢူဝ်းဝေႇၶဝ် တႅမ်ႈထတ်းသၢင်သေႉၼေးတေႃႇ ၾိင်ႈမိူင်းမႂ်ႇ လွင်ႈလူင်ပွင်ၸိုင်ႈ မိူင်းမၢၼ်ႊ။ ၶဝ်တႅမ်ႈဝႃႈ ပေႃးဢဝ်ၾိင်ႈမိူင်းၼႆႉၵႂႃႇၼႃႈ မိူင်းမၢၼ်ႊ တေသိုပ်ႇပဵၼ်ၶႃႈ၊ ဢိင်းၵလဵတ်ႈၶဝ် တေတိူဝ်းၵုမ်းၵမ်မႃး လိူဝ်ၵဝ်ႇ ၼႆယဝ်ႉ။ ယွၼ်ႉပိူဝ်ႈ မၼ်းႁဵတ်းသၢင်ႈၸိူင်ႉၼႆလႄႈ ၽူႈမီးပုၼ်ႈၽွၼ်း ၸၼ်ႉၸွမ်ၶဝ် ႁိုပ်ႈဢွင်ႇသၢၼ်း ဢွၵ်ႇပႅတ်ႈႁူင်းႁဵၼ်း။ 

ၽၢႆႇလင် ဢွင်ႇသၢၼ်းၼႆႉ မီးထႅင်ႈ ႁူဝ်ၼႃႈ လုၵ်ႈႁဵၼ်းၵေႃႉ႞ ၸိုဝ်ႈမႃး ႁွင်ႉဝႃႈ တၶိၼ်ႇၼု ၼႆယဝ်ႉ။ ပဵၼ်ၵူၼ်းတူဝ်လဵၵ်ႉသေးသေးဢွၼ်ႇ။ မၢၵ်ႇတႃမၼ်းၵေႃႈ မိူၼ်ႁၢင်ႊၶီငဝ်ဝႆႉတႃႇသေႇယဝ်ႉ။ 

တၶိၼ်ႇၼုၼႆႉ မီးၽၼ်တႃႇတေပဵၼ်မႃး ၽူႈတႅမ်ႈၸိူင်းၵႃႈ။ ၵွပ်ႈၼႆ မၼ်းဢွၵ်ႇ မၢၼ်ႈၵဝ်ႇမိူင်းလင်မၼ်း ဢၼ်ပဵၼ် ထုင်ႉသူပ်းၵဵဝ်ၼၼ်ႉသေ မႃးၶိုၼ်ႈႁဵၼ်း တီႈယၼ်ႇၵုင်ႇ။ မၼ်းၶတ်းၸႂ်လိၵ်ႈ။ ႁၢၼ်ႉတေႃႇၸူပ်းၸုမ်ႈၶူး။ မိူဝ်းႁဵတ်း ၶူးသွၼ်လိၵ်ႈ တီႈဝဵင်းဢွၼ်ႇ ဝဵင်း႞ယဝ်ႉ ဢဝ်မေးတီႈၼၼ်ႉ။ မေးမၼ်းပဵၼ် လုၵ်ႈၵူၼ်းမီး။ ယွၼ်ႉပိူဝ်ႈမၼ်းၶႂ်ႈပဵၼ် ၵူၼ်းၸိုဝ်ႈသဵင်လိုဝ်းလင်လႄႈ ၸင်ႇၶိုၼ်းမႃး တေႃႇႁဵၼ်းထႅင်ႈ တီႈၸၼ်ႉၸွမ်။ မိူဝ်ႈၼၼ်ႉ ၸင်ႇၶဝ်ႈႁူမ်ႈပႃးၸွမ်း ၸုမ်းဢွင်ႇသၢၼ်းၶဝ်။ တၶိၼ်ႇၼုၼႆႉ သွၼ်လိၵ်ႈပၼ်ပိူၼ်ႈ၊ ပိၼ်ႇတႅမ်ႈပပ်ႉလိၵ်ႈသေ ႁႃငိုၼ်း။ ၼႂ်းၼၼ်ႉ တေပႃး ပပ်ႉ ၶေႃႈပိုၼ်ၽၢဝ်ႇ ၶွမ်ႇမိဝ်ႇၼိတ်ႈ/Communist Manifesto လႄႈ ပပ်ႉ How to Win Friends and Influence People ဢၼ် Dale Carnage တႅမ်ႈ။ ၼႂ်းၸႂ်မၼ်းတႄႉ တၢင်းႁၼ် ပၢႆးမၢၵ်ႈမီး ၽၢႆႇသၢႆႉ လႄႈ ၽၢႆႇၶႂႃ လေႃးလႄးၵၼ်ဝႆႉ။ မၼ်းပဵၼ်မႃး ႁူဝ်ပဝ်ႈ ႁူမ်ႈတုမ်လုၵ်ႈႁဵၼ်းသေ ပဵၼ်မႃးၵႅမ်ဢွင်ႇသၢၼ်း ၼႆၵေႃႈ ဝႃႈလႆႈယဝ်ႉ။ 

ယွၼ်ႉပိူဝ်ႈ ဢွင်ႇသၢၼ်း ၺႃးႁိုပ်ႈဢွၵ်ႇၸၼ်ႉၸွမ်လႄႈ တၶိၼ်ႇၼု ၸင်ႇမႃးတႅၼ်းတၢင်ၵွႆး။ တၶိၼ်ႇၼု ယၢမ်ႈဢွၼ်ႁူဝ် လုၵ်ႈႁဵၼ်းၶဝ် ၵႂႃႇၼႄၵၢင်ၸႂ် တီႈၽၢႆႇၼႃႈႁေႃၶုၼ်ပွင်မိူင်းသေ ၸုတ်ႇပႅတ်ႈတုင်းဢိင်းၵလဵတ်ႈ။ ႁွင်ႉသႅၼ်ႇ ၶေႃႈတုၵ်းယွၼ်း။ တၶိၼ်ႇၼုၵေႃႈ ၵိုင်ႉၵၢင်ႉ ႁၼ်ထိုင်ဝႃႈ တူဝ်မၼ်းၼႆႉ ႁတ်းႁၢၼ်မႃး မိူၼ်ႁူဝ်ၼႃႈလီၵေႃႉ႞။

ၸဝ်ႈသူၺ်ႇတႅၵ်ႈ လႄႈ လုၵ်ႈမေးမၼ်း မိူဝ်ႈပီႊ ၁၉၃၄

မိူဝ်ႈမိူင်းမၢၼ်ႊ ၸတ်းႁဵတ်း ပၢင်လိူၵ်ႈတင်ႈၼၼ်ႉ ၸုမ်းတၶိၼ်ႇၶဝ် တႅပ်းတတ်း တႃႇလူင်းလိူၵ်ႈတင်ႈ။ ၼႂ်းပၢင်လိူၵ်ႈတင်ႈၼၼ်ႉ ၶဝ်ဢွင်ႇပေႉ ၶဵတ်ႇလိူၵ်ႈတင်ႈ သီႇတီႈ။ 

ၼႂ်းလုမ်းတႅၼ်းၽွင်းထၢၼ်ႈတႂ်ႈ ဢၼ်ဢွၵ်ႇမႃး တီႈပၢင်လိူၵ်ႈတင်ႈ ဢၼ်ၸတ်းႁဵတ်း မိူဝ်ႈလိူၼ်ဢေႇပရႄႇ ပီႊ ၁၉၃၇ ၼၼ်ႉ ဢမ်ႇမီးၸုမ်းလႂ်ပႃႇတီႇလႂ် ပေႉၽၢႆႇၼမ်။ ၵွပ်ႈၼႆ တွၵ်ႇတႃႇပႃႉမေႃႇ ႁူဝ်ၼႃႈ ပႃႇတီႇသၢင်းလႄးသႃး (ပႃႇတီႇၵူၼ်းၽၢၼ်) လႆႈဢွၼ်ႁူဝ်သေ ၽွတ်ႈႁႅၼ်း လူင်ပွင်ၸိုင်ႈ ႁူမ်ႈသၢင်ႈ။ ၵိုင်ႇပေႃးဝႃႈ ပႃႇတီႇသၢင်းလႄးသႃးယူႇ။ လုၵ်ႈၸုမ်းၶဝ်ၼၼ်ႉ တေႃႉတႄႉမီးငိုၼ်း တႃႇၸၢႆႇၵႃႊလႅင်ၾႆးသေ မႃးယၼ်ႇၵုင်ႇ။ ၵၢၼ်ဢၼ်ၶဝ် ႁဵတ်းသၢင်ႈ ၼႂ်းလုမ်းတႅၼ်းၽွင်း ဢွၼ်တၢင်းသုတ်းၼၼ်ႉ တႅပ်းတတ်းဝႃႈ တႃႇတေပၼ် ငိုၼ်းလိူၼ် ၽူႈတႅၼ်းၽွင်းၶဝ် ၼိုင်ႈလိူၼ် ၂၂၅ ပွင်ႇ (ငိုၼ်းရူးပီး ၅၀၀၀) ၼၼ်ႉယဝ်ႉ။ ၽူႈတႅၼ်းၽွင်း ၵူၼ်းၼုမ်ႇ သီႇၵေႃႉ ဢၼ်လုၵ်ႉတီႈၸုမ်းတၶိၼ်ႇၶဝ် ဢွင်ႇပေႉသေ ၶိုၼ်ႈမႃးၼၼ်ႉတႄႉ ပၢၵ်ႈထဵင်ဝႃႈ ၶဝ်တိုၼ်းတေဢမ်ႇႁပ်ႉငိုၼ်းလိူၼ် ၽူႈတႅၼ်းၽွင်းၼႆႉ ၼႆယဝ်ႉ။ တၶိၼ်ႇၶဝ် တႅပ်းတတ်း သဵၼ်ႈၸႂ်ဝႆႉ တႃႇတေႁဵတ်းပဵၼ် တူဝ်ယၢင်ႇမႂ်ႇ ၽူႈဢွၼ်ႁူဝ် ၸိူဝ်းဢမ်ႇမေႃၵိၼ်သူးၵိၼ်လၢပ်ႈ၊ ၸိူဝ်းဢမ်ႇမေႃတူၺ်း တႃႇသုၼ်ႇတူဝ်ၵေႃႉလဵဝ် ၼႆယဝ်ႉ။ ၶဝ်သၢၼ်ၶတ်းတေႃႇ လၵ်းမိူင်းမႂ်ႇ မိူင်းမၢၼ်ႊ။ သေႉသွမ်းဝႃႈ ပဵၼ်တီႇမူဝ်ႇၶရေႇၸီႇ ဢၼ်လီဢၢႆၼႃႈဢၢႆတႃ၊ ဢၼ်မီးၽၢႆႇတႂ်ႈ ၶုၼ်ၽွင်းလူင် ဢၼ်လၼ်ႇတၼ်ႇ တႅင်ႇတင်ႈဝႆႉၼၼ်ႉၵွႆး ၼႆယဝ်ႉ။ 

တီႈတေႉ ဢိင်းၵလဵတ်ႈၶဝ် ဢမ်ႇတႅင်ႇတင်ႈဝႆႉ ၶုၼ်ၽွင်းလူင် တႃႇမိူင်းမၢၼ်ႊၶေႃၶေႃ။ ၶုၼ်ၽွင်းမိူင်း ၵၢၼ်မိူင်းဢိၼ်းတီးယႃးၵွႆး ယိပ်းၵမ်ၸွမ်း ၵၢၼ်မိူင်းမၢၼ်ႊ။ လွင်ႈဝႃႈ ဢဝ်မိူင်းမၢၼ်ႊ ၽၢတ်ႇဢွၵ်ႇ မိူင်းဢိၼ်းတီးယႃး ဢၼ်ဝႃႈၼၼ်ႉ မီးၼႂ်းၽိုၼ်ၸေႈၵွႆး။ ဢၼ်လႅၵ်ႈလၢႆႈၵႂႃႇၼၼ်ႉ ဢမ်ႇမီးသင်တေႉတေႉ။ ၵွပ်ႈၼႆ ၸုမ်းတၶိၼ်ႇၶဝ် ဢဝ်ပပ်ႉၾိင်ႈမိူင်းလူင်ပွင်ၸိုင်ႈမိူင်းမၢၼ်ႊ ၸုတ်ႇၼႄထႅင်ႈ တီႈၽၢႆႇၼႃႈလုမ်းတႅၼ်းၽွင်းၵွၼ်ႇယဝ်ႉ။ 

သင်ဝႃႈ ၸဝ်ႈႁိူၼ်းၶမ်း လႆႈၵႂႃႇၶိုၼ်ႈၸၼ်ႉၸွမ် ၸွမ်းၼင်ႇ မၼ်းယၢမ်ႈၽၼ်ဝႆႉ ၼႆၸိုင် တၢမ်တူဝ်မၼ်း တေလႆႈႁၼ် ပိူင်ပဵၼ်ၸိူဝ်းၼႆႉလီလီယူႇယဝ်ႉ။ မိူဝ်ႈလဵဝ်တႄႉ ဢမ်ႇမီးတၢင်းမုင်ႈမွင်းသင်သေမဝ်ႇၵႃး လႆႈယူႇသဝ်းဝႆႉ မိူၼ်ၵူၼ်းတူၵ်းၶွၵ်ႈ ၼႂ်းႁေႃသႅၼ်ဝီယူႇယဝ်ႉ။ ပေႃးၵၢင်ၶမ်ႈမႃး လုၵ်ႉတီႈႁူးလႅင်းႁွင်ႇမၼ်း မုင်ႈတူၺ်းၵႂႃႇတၢင်းဝဵင်းသႅၼ်ဝီ။ မၼ်းဝူၼ်ႉၺႃး လွင်ႈပီႈၼၢင်းမၼ်း ၵေႃႉပၢႆႈၸွမ်း မိတ်ႈသတႃႇ ၵေႃႇတူႇဢိၼ်ႇ ၵႂႃႇတၢင်းမိူင်းၶႄႇပုၼ်ႉ။ မိူဝ်ႈဝၼ်းၼၼ်ႉ ပႆႇမီးၸဝ်ႈၾႃႉ ၵေႃႉတေႁၢမ်ႈ ပီႈၼၢင်းမၼ်းလူး။ ငဝ်းလၢႆး ၸဝ်ႈႁိူၼ်းၶမ်းတႄႉ ဢမ်ႇမိူၼ်ငဝ်းလၢႆး ပီႈၼၢင်းမၼ်း။ ၸဝ်ႈပီႈၾႃႉမၼ်း တူၺ်းၸွမ်း လိၵ်ႈဢၼ်မႃးတီႈမၼ်း လႄႈ လွင်ႈၵႂႃႇလွင်ႈမႃးမၼ်းယူႇယဝ်ႉ။ တႃႇၸဝ်ႈႁိူၼ်းၶမ်း တေပၢႆႈဢွၵ်ႇပူၼ်ႉလႆႈ ၾၵ်းတူဝၢင်းႁေႃၼၼ်ႉ ဢမ်ႇပဵၼ်လႆႈ သေဢိတ်း။ သင်ပၢႆႈပူၼ်ႉလႆႈၵေႃႈ မၼ်းတေလႆႈၵႂႃႇလႂ်။ ဝဵင်းဢွၼ်ႇ ဢၼ်လုၵ်ႉတီႈႁူးလႅင်းမၼ်း လႆႈႁၼ်ယူႇဝႆႉၼၼ်ႉ မွင်သေႃႇႁေႃႇဝႆႉယဝ်ႉ။ ၸဝ်ႈႁိူၼ်းၶမ်း ႁူႉတူဝ်ဝႃႈ ဢမ်ႇမီးၽႂ်ၸွႆႈမၼ်းလႆႈယဝ်ႉ။ 

ဝၢႆးသေ ႁူဝ်ၾူၼ်တူၵ်းယဝ်ႉ ၼႂ်းလိူၼ်မေႇသေ မွၵ်ႇၵုမ်ႈၾူၼ်ၶဝ် ၶွၼ်ႈၵၼ်ယူႇ ၼိူဝ်ၵၢင်ႁၢဝ် ၸဵင်ႇၸၢၼ်းဝၼ်းတူၵ်းၼၼ်ႉ ၵူၼ်းမၢၼ်ႈၶဝ် ၵူႊတီႈတီႈ မႃးၽႅဝ်သႅၼ်ဝီ တႃႇတေၶဝ်ႈႁူမ်ႈပၢင်ၵူပ်ႉၵူႈသွၼ်ႉမိင်ႈ။ တီႈႁေႃ ဢၼ်မီးၼိူဝ်ၵွင်းလွႆၼၼ်ႉၵေႃႈ ၵၢၼ်သုၵ်ႉယုင်ႈ ပိူဝ်ႈတႃႇတေ ၶပ်ႉၶိုင်ႁပ်ႉတွၼ်ႈၶႅၵ်ႇတီႈၵႆယူႇယဝ်ႉ။ 

သိူဝ်ႈၶူဝ်း ဢၼ်တေႃးဝႆႉတင်း မႆလၢႆႈမႆၶမ်း လႄႈ ၽႃႈပၢႆႉဢၼ်ဢဝ်ၶႆႇမုၵ်ႉ ႁၢင်ႈၶိူင်ႈဝႆႉ ၸိူဝ်းၼၼ်ႉၵေႃႈ လုၵ်ႉမၢၼ်းတလေး မႃးထိုင်သႅၼ်ဝီယဝ်ႉ။ ပိူၼ်ႈသုၵ်ႉသၢၵ်ႉဝႆႉပေႃးတၢၼ်ႇၼႆႉသေတႃႉ ၸဝ်ႈႁိူၼ်းၶမ်းတႄႉ ဢမ်ႇတၵ်းသဵင်ၸွမ်းသေၶေႃႈ။

မၼ်းလၢတ်ႈႁင်းၵွႆးမၼ်းဝႃႈ ၵၢၼ်ၸိူဝ်းၼႆႉ ဢမ်ႇၵဵဝ်ႇတင်းၵဝ် ၼႆယဝ်ႉ။ 

ၽိူဝ်ႇထိုင်ဝၼ်းဢၼ်လိူၵ်ႈဝႆႉ တႃႇၵူပ်ႉၵူႈသွၼ်ႉမိင်ႈၼၼ်ႉ ဢွၼ်ႇယိင်းၼႂ်းႁေႃၶဝ် သိၼ်ႈမၢၼ်းတလေးၼၼ်ႉ ဝဵၼ်းပၼ် ၸဝ်ႈႁိူၼ်းၶမ်း။ သႂ်ႇပၼ်မၢၵ်ႇတုမ်ႇသႅင် တီႈသိူဝ်ႈ ႁႂ်ႈပေႃးႁတ်ႉတီႈတူဝ်။ ဢဝ်ၽႃႈပၢႆႉမႆၶမ်း မႃးပၢႆႉဝႆႉ ၼိူဝ်ႁူဝ်မႃႇမၼ်း။ ဝီပၼ်ၸွၵ်းပၼ် ၶူၼ်ႁူဝ်မၼ်း ႁႂ်ႈဢွၵ်ႇႁၢင်ႊ ၼႂ်းႁၢင်ႈၼႂ်းႁေႃယဝ်ႉ ဢဝ်မၢတ်ႇႁူဝ်ၸိင်ႇ လႄႈ ဝီႁူဝ်ၸိင်ႇ ပၵ်းသေ ႁၢင်ႈၶိူင်ႈပၼ်ထႅင်ႈ။

တၢင်းၼွၵ်ႈႁေႃမႂ်ႇၼႆႉ ပိူၼ်ႈဢွၼ်ႁၢင်ႈႁႅၼ်းဝႆႉ တႃႇႁပ်ႉသူင်ႇ ၸဝ်ႈသၢဝ် ၵႂႃႇၸူး ႁေႃလူင် ၼႂ်းၵၢင်ဝဵင်းယူႇယဝ်ႉ။ 

မၼ်းလၢတ်ႈႁင်းၵွႆးမၼ်းထႅင်ႈဝႃႈ ၵၢၼ်ၸိူဝ်းၼႆႉ ဢမ်ႇၵဵဝ်ႇတင်းၵဝ် ၼႆယဝ်ႉ။ 

ပၢင်ၵူပ်ႉၵူႈသွၼ်ႉမိင်ႈၼႆႉ ဢမ်ႇၸႂ်ႈပၢင်ယႂ်ႇပၢင်လူင်။ မိူဝ်ႈၵူႊပွၵ်ႈ ၵၢႆႇတေႃႇမေႃႈ ၼႂ်းၵၢင်ပၢင်ႇသေ ၸတ်းပၢင်ၵူပ်ႉၵူႈသွၼ်ႉမိင်ႈ။ ၵူၺ်းၵႃႈ ၵမ်းၼႆႉ မႃးၸတ်းႁဵတ်း ၼႂ်းႁွင်ႈလူင်ၵၢင်ႁေႃ ၵမ်းလဵဝ်ယဝ်ႉ။ ၼႂ်းၵၢင်ႁေႃလူင်ၼၼ်ႉ ၸဝ်ႈႁိူၼ်းၶမ်း လႆႈၶုပ်ႉၶဝ်ႇ ၼင်ႈၸွမ်း ၸဝ်ႈမၢဝ်ႇမၼ်း ၸဝ်ႈၾႃႉယွင်ႁူၺ်ႈ။ ၸဝ်ႈႁိူၼ်းၶမ်း ၶုၵ်းၸႂ်လႆႈ မိူဝ်ႈၶဝ်ၵေႃႉလဵၵ်ႉ လဵၼ်ႈယူႇ ၸွမ်းၵႄႈၵၢင် သဝ်ႁေႃၸိူဝ်းၼၼ်ႉ မူၼ်ႈမူၼ်ႈသိူဝ်းသိူဝ်း။ ႁုၼ်ႉၵၼ်ၶူဝ်ၵၼ် ၼႂ်းလပ်းသိင်ႇ ၼႂ်းလႅတ်ႇၸိူဝ်းၼၼ်ႉ။ မိူဝ်ႈလဵဝ်တႄႉ မၼ်းဢမ်ႇၸႂ်ႈလုၵ်ႈဢွၼ်ႇယဝ်ႉ။ ၸဝ်ႈပီႈၾႃႉမၼ်း ဢဝ်မိုဝ်းမၼ်း လႄႈ မိုဝ်းၸဝ်ႈမၢဝ်ႇ ႁွမ်းပၼ်သေ ဢဝ်ၽႅၼ်ႇလၢႆႈမတ်ႉပၼ်ယူႇယဝ်ႉ။ မၼ်းတၼ်းႁူႉဝႃႈ ၼမ်ႉမုၼ်း ယွတ်ႇတူၵ်းမႃးၼိူဝ် မိုဝ်းၶႃသွင်ၵေႃႉ ဢၼ်မတ်ႉႁွမ်းၵၼ်ဝႆႉၼၼ်ႉၵွႆး။ 

ယဝ်ႉၵႂႃႇယဝ်ႉ။ ၸဝ်ႈႁိူၼ်းၶမ်း လႆႈတႄႇၼႃႈႁေႃတေႃႁိူၼ်းယဝ်ႉ။ မၼ်းၵူမ်ႈႁူဝ်ဝႆႉသေ ၸွမ်းၽၢႆႇလင်ၽူဝ်မၼ်းသေ ဢွၵ်ႇမႃးတၢင်းၼွၵ်ႈ။ 

ၸဝ်ႈသူၺ်ႇတႅၵ်ႈ လႄႈ မုထၢမ်းမၼ်း ဢွၼ်တႄႇပၢင်။ ဢွၼ်ၵၼ်ႁပ်ႉတွၼ်ႈၶႅၵ်ႇ ၸိူဝ်းဢၼ် မႃးယွၼ်းသူးပၼ်ၶဝ်။ ၸဝ်ႈႁိူၼ်းၶမ်းတႄႉ ပႆၸွမ်းၽၢႆႇလင်သေ ဢမ်ႇယုမ်ႉဢမ်ႇယၢႆႈသေဢိတ်း။ ပဵၼ်ၾၢင်ႁၢင်ႊၸဝ်ႈသၢဝ်တႆး ဢၼ်ၵူၼ်းတင်းၼမ် ယွမ်းႁပ်ႉလႆႈၼၼ်ႉယဝ်ႉ။ ၸဝ်ႈႁိူၼ်းၶမ်း ယၢမ်ႈၽၼ်ႁၼ်ပွၵ်ႈ႞။ မၼ်းလႆႈငိၼ်းသဵင်ႁုၼ်ႉသဵင်ၶူဝ် ၸွမ်းၼႂ်းပၢင်ၼႂ်းပွႆးၼၼ်ႉ။ သဵင်ၸဝ်ႈပီႈၾႃႉမၼ်း လင်သေပိူၼ်ႈယဝ်ႉ။ ၸွမ်းၼင်ႇ ယၢမ်ႈမီးထုင်းမႃးၼၼ်ႉ မုထၢမ်း ၸဝ်ႈႁူမ်ႇၾႃႉၶဝ် ၵၢင်သၢႆၶမ်းႁေႉႁၢမ်ႈ ၽၢႆႇၼႃႈတၢင်းပႆၶဝ်။ ၸဝ်ႈပီႈၾႃႉမၼ်း ယွၼ်းငိုၼ်းၵႃႊလတ်းၽၢၼ်ႇ။ ၵူၼ်းၽၢႆႇၸဝ်ႈမၢဝ်ႇၶဝ် ဢဝ်ငိုၼ်းၵမ်ႈၽွင်ႈပၼ်ယဝ်ႉၵေႃႈ ဢဝ်သၢႆၶမ်းၼၼ်ႉ ပၢၵ်ႈပႅတ်ႈၶိုၼ်း။ ၸဝ်ႈပီႈၾႃႉမၼ်းၵေႃႈ ယၢင်ႇပၼ်သဵၼ်ႈတၢင်းလႄႈ ၶႃပူႇဢွၵ်ႇၵေႃႈ သိုပ်ႇပႆလႆႈမႃးၽၢႆႇၼႃႈ။ ပၢင်ၵူပ်ႉၵူႈသွၼ်ႉမိင်ႈၵေႃႈ ယဝ်ႉတူဝ်ႈလီငၢမ်းယဝ်ႉ။ 

ၵူပ်ႉၵူႈသွၼ်ႉမိင်ႈၵၼ်ယဝ်ႉ ထႅင်ႈလၢႆဝၼ်း ဢမ်ႇႁိုင်သင် ၸဝ်ႈႁိူၼ်းၶမ်းၶဝ်ပူႇဢွၵ်ႇၵေႃႈ ဢွၵ်ႇသေသႅၼ်ဝီမႃး။ ၶီႇၵႃး လတ်းၽၢၼ်ႇ မိူင်းတႆးပွတ်းၵၢင်မႃး ၶၢဝ်းတၢင်း ၁၂၅ လၵ်း။ သဵၼ်ႈတၢင်းၼႆႉ လူင်းမႃးတၢင်း မိူင်းတႆးပွတ်းၸၢၼ်း မိူၼ်တင်း ၼမ်ႉၶူင်းလႆမႃးၼၼ်ႉယဝ်ႉ။ ၵူၼ်းႁေႃႈၵႃးၵေႃႈ လႆႈၶတ်းၸႂ်ႁေႃႈမႃး ၸွမ်းတၢင်းဢၼ်ယၢပ်ႇ။ တီႈဢၼ်လူဝ်ႇသႂ်ႇၵႄးၵေႃႈ သႂ်ႇ၊ ပေႃးၽုၼ်ႇမုၵ်ႉၸပ်း တီႈၽႃမၢၼ်ႇၵႃးၵေႃႈ လႆႈၸဵတ်ႉ။ ၵႃးၸိူဝ်းဢၼ် ၸွမ်းၵႃးၶဝ်မႃးၵေႃႈ မီးထႅင်ႈလၢႆလၢႆလမ်း။ ပဵၼ်ၵႃးၸိူဝ်းဢၼ် မုထၢမ်း လႄႈ ၸဝ်ႈၼႃႈတီႈ မိူင်းယွင်ႁူၺ်ႈၶဝ်ၶီႇ လႄႈ ၵႃးၸိူဝ်းဢၼ်တေႃႉတၢင်ႇမႃး ၶူဝ်းတွၼ်ႈၶွင်ၾၢၵ်ႇ ပၢင်ပွႆးၵူပ်ႉၵူႈသွၼ်ႉမိင်ႈ။ ၶူဝ်းတွၼ်ႈၵမ်ႈပႃႈၼမ်ၼႆႉ   ဝၢၼ်ႇငိုၼ်း လႄႈ ၽႃႈႁူမ်ႇယဝ်ႉ။ ၶူဝ်းသုၼ်ႇတူဝ် ၸဝ်ႈႁိူၼ်းၶမ်းတႄႉ ပႃးမႃးၶူဝ်းၼုင်ႈဢိတ်းဢွတ်း လႄႈ ၶူဝ်းၶမ်းၵႅဝ်ႈသႅင် ၵမ်ႈၽွင်ႈၵွႆး။ 

ၸႂ်ၸဝ်ႈႁိူၼ်းၶမ်းတႄႉ ဢမ်ႇသိူဝ်းဢမ်ႇမူၼ်ႈသေဢိတ်း။ ၵူၺ်းၵႃႈ ၼမ်ႉၸႂ်မၼ်းတႄႉ ႁူႉဝႃႈ လူဝ်ႇလႆႈၶီးၸိုၼ်ႈၵႂႃႇၼႃႈ။ မၼ်းသိူင်ႇသိမ်းဝႆႉ တၢင်းဢၼ်မီးၼႂ်းၸႂ်သေ ၸွမ်းၶၢဝ်းတၢင်းယၢဝ်းၼႆႉ တူၺ်းငဝ်းလၢႆးသေ ဢုပ်ႇလၢတ်ႈတေႃႇ ၽူဝ်မၼ်းမႃးယူႇ ဢိတ်းဢွတ်း။ ၶၢဝ်းတၢင်းၶဝ်ၼႆႉ ထိူင်းၼႃႇ။ ၸွမ်းတၢင်း လႆႈဝႄႉတူင်ႉတၵ်ႉ ၵူၼ်းမၢၼ်ႈ ၸိူဝ်းဢၼ် ပႂ်ႉႁပ်ႉတွၼ်ႈ ၸဝ်ႈၾႃႉ လႄႈ ၼၢင်းမႂ်ႇမၼ်း။ ယွၼ်ႉပိူဝ်ႈ ၵူၼ်းတင်းၼမ် ၼပ်ႉယမ်ပႂ်ႉႁပ်ႉတွၼ်ႈလႄႈ ၸဝ်ႈႁိူၼ်းၶမ်းၼႆႉ ၶႂ်ႈမိူၼ် ၼၢင်းယိင်း ဢႃႇယုယႂ်ႇမႃးၵေႃႉ႞ယဝ်ႉ။ 

လုၵ်ႉသႅၼ်ဝီ ဢွၵ်ႇမႃး ႁိုင်သၢမ်ဝၼ်းၸင်ႇ ၶဝ်ထိုင်လွႆလႅမ်။ လုၵ်ႉတီႈၼၼ်ႉ ဝၢႆႇၼႃႈၸူးတွင်ၵီႈသေ လူင်းမႃးတၢင်းတူၵ်း။ တီႈဝဵင်းတွင်ၵီႈ တေလႆႈႁၼ် ၵျွင်းၽြႃးၶရိတ်ႈယၢၼ်ႇ လင်ယႂ်ႇယႂ်ႇ သွင်လင် မီးၸွမ်းၵၼ်သေ ပႅၼ်သုင်ဝႆႉ ၸွမ်းႁၢဝ်းလွႆၶဵဝ်ၶဵဝ်။ ႁိူၼ်းဢွၼ်ႇ ဢၼ်ၵေႃႇသၢင်ႈမႂ်ႇမႂ်ႇၸိူဝ်းၼၼ်ႉၵေႃႈ မီးၸွမ်းဝႆႉတိၼ်လွႆ။ လုၵ်ႉတီႈတိၼ်လွႆ မီးၶူဝ်လႆ ၶိုၼ်ႈၸူး ၵွင်းမူးၶၢဝ်ၶၢဝ် ဢၼ်မီးၼိူဝ်ၸိၵ်းလွႆၼၼ်ႉ။ မွၵ်ႇတၢင်မႂ်ၶရိတ်ႉသီလႅင် လႄႈ သီၶၢဝ်လႄႈသင်၊ မွၵ်ႇမႆႉယူမ်း သီၶွင်ႇလႄႈသင် ၵီႊယူႇၵူႊတီႈၵူႊတၢင်း။ ၵွပ်ႈၼႆ မႄႈမိူင်း တီႈဢိင်းၵလဵတ်ႈၶဝ် ပၵ်းသဝ်း ၼႂ်းတွၼ်ႈၶွပ်ႇၼမ်ႉလႅၼ်လိၼ်ၼႆႉ လီယဵမ်ႈလီတူၺ်းဝႆႉယူႇယဝ်ႉ။ 

ပေႃးလုၵ်ႉတီႈ ၼိူဝ်လွႆဝဵင်းတွင်ၵီႈလူင်းမႃး လႆႈငွၵ်းလႆႈငႅၵ်း သၢမ်ပွၵ်ႈယဝ်ႉၸင်ႇ လုၵ်ႉၼႂ်းၵႄႈတူၼ်ႈမႆႉတူၼ်ႈတွၵ်ႇသေ လႆႈႁၼ်ထုင်ႉယွင်ႁူၺ်ႈ။ လႆႈႁၼ်ပႃး ၼွင်ၵႃၽိူၵ်ႇ ဢၼ်ဝဝ်းဝုၵ်ႉဝုၵ်ႉဝၢၵ်ႉဝၢၵ်ႉဝႆႉ။ ပဵၼ်ၼွင်ဢၼ် ယၢမ်ႈၺွပ်းလႆႈ ၵႃၽိူၵ်ႇ ဢၼ်ဝႆႉတီႈႁေႃယွင်ႁူၺ်ႈ ဢၼ်ဝႃႈၼၼ်ႉယဝ်ႉ။ လိူဝ်ၼၼ်ႉၵေႃႈ တေလႆႈႁၼ် တူင်ႈၼႃး ပဵၼ်လွၵ်းပဵၼ်လႅၵ်းဝႆႉ။ တူၼ်ႈမႆႉၸိူဝ်းဢၼ် မိူၼ်မုၵ်ႉၾႆးၼၼ်ႉၵေႃႈ မီးဝႆႉၸွမ်းၽင်ႇၼွင် ပဵၼ်တႅဝ်း။ မွၵ်ႇလႅင်လႅင်ၸိူဝ်းၼၼ်ႉၵေႃႈ ၵီႊဝႆႉၼိူဝ်ၵိင်ႇၶႃႊၽိူၵ်ႇၽိူၵ်ႇ။ ပေႃးထႅင်ႈငွၵ်း႞ ဢမ်ႇလႆႈႁၼ် ၾၢင်ႁၢင်ႊၸိူဝ်းၼၼ်ႉယဝ်ႉ။ ၵႃးၵေႃႈ ႁေႃႈၶဝ်ႈမႃးၼႂ်း ပႃႇမႆႉတေႃႇပေႃးထိုင် တီႈတိၼ်လွႆ။ ပေႃးပူၼ်ႉၼၼ်ႉၵေႃႈ ႁွတ်ႈၽႅဝ် တၢင်းသုမ် ဢၼ်တေၽႄၵႂႃႇတၢင်းယွင်ႁူၺ်ႈ။ ၽိူဝ်ႇငွၵ်းၶဝ်ႈမႃးၸဵင်ႇၸၢၼ်း ၽၢႆႇၶႂႃတၢင်းၼႆ တေလႆႈႁၼ်တူင်ႈၼႃး ၸိူဝ်းဢၼ် ထိူၼ်ႇထႆဝႆႉသေ တူဝ်ႈတၼ်း တႃႇသွမ်ႈၵႃႈၼၼ်ႉ။ ၽၢႆႇသၢႆႉတၢင်းတႄႉ လႆႈႁၼ် ၵႂၢႆးၸိူဝ်းဢၼ်လုၵ်ႉၼႂ်း ဢိူင်ႇၶိူဝ်သေ ယုၵ်ႉႁူဝ်တူၺ်းမႃး။ ၶဝ်ၶဝ်ၼၼ်ႉ ယၢဝ်းၼႃႇလႄႈ ပေႃးၶႂ်ႈထိုင် ႁူဝ်မႃႇၶဝ်ယဝ်ႉ။ မၢၼ်ႁူၶဝ်ၵေႃႈ ၽႅတ်းလၢတ်းလၢတ်းလိတ်းလိတ်း။ ၸဵမ်မိူဝ်ႈလိူၼ်ၼူဝ်ႇဝႅမ်ႇပႃႇၼၼ်ႉ ၵႂၢႆးၶဝ်လႆႈလိုဝ်ႈၵၢၼ်ၶဝ်ယဝ်ႉၼႃႇ။ 

မိူဝ်ႈၸမ်တေၶဝ်ႈဝဵင်းယွင်ႁူၺ်ႈတႄႉ ဢမ်ႇလႆႈႁၼ် တူင်ႈၼႃးယဝ်ႉ။ ၸွမ်းၽင်ႇတၢင်း တေလႆႈႁၼ် လိၼ်ဢုင်ပႃႇၶၢႆး။ မိူဝ်ႈထိုင်တီႈၵွင်းမူးၶၢဝ် ဢၼ်တိုၵ်ႉႁၢင်ႈယၢမ်းသေ ၵေႃႇသၢင်ႈယူႇၼၼ်ႉ သဵၼ်ႈတၢင်းသမ်ႉ လႆႈၵူတ်ႉမိူၼ်ငွၵ်းသွၵ်ႇ သွင်ၵမ်းသေ ဝႄႈယၢင်ႇၵႂႃႇ။ ၸဝ်ႈၾႃႉၵူႊၵေႃႉၼၼ်ႉ တၵ်းတေလႆႈတႄႇၵွင်းမူး၊ သၢင်ႈဝတ်ႉဝႃးၽႃသိူဝ်ႇ ပိူဝ်ႈတႃႇ တေလႆႈၼႃးမုၼ်တၢင်းလီ။ ၸဝ်ႈသူၺ်ႇတႅၵ်ႈတႄႉ တေလႆႈၶတ်းၸႂ် ၼင်ႇႁိုဝ် တေပူၼ်ႉလႆႈ လွင်ႈလူႇလွင်ႈတၢၼ်း ၸဝ်ႈလုင်းၶဝ်တေႉတေႉယူႇ။ မိူဝ်ႈလဵဝ် တိုၵ်ႉႁႃတႄႇၵွႆး။ 

မိူဝ်ႈႁွတ်ႈၽႅဝ်မႃး တီႈၶႅပ်ႇဝဵင်း လႆႈႁၼ်ၸွမ်းတၢင်း တဵတ်ႇယဵၼ်ဝႆႉ။ ၸဝ်ႈႁိူၼ်းၶမ်း ၶုၵ်းၸႂ်လႆႈၵႂႃႇ ၶၢဝ်းတၢင်း လဵပ်ႈႁဵၼ်း မိူဝ်ႈၽွင်းမၼ်းတိုၵ်ႉၶိုၼ်ႈႁဵၼ်းယူႇ။ လႆႈသုတ်ႇပႃးဢၢႆႊဢုင်ဢၢႆႊၶၢႆးၸိူဝ်းဢၼ် လုၵ်ႉတၢင်းၵေႃတူၼ်ႈမၢၵ်ႇဢုၼ် ဢွၵ်ႇမႃးၼၼ်ႉ။ ယဝ်ႉၵေႃႈ လႆႈယိၼ်းဢူဢၢႆႁေႃၶမ်းယွင်ႁူၺ်ႈမႃးယူႇယဝ်ႉ။ ဢီႈသင်ၵေႃႈ ပႆႇႁၼ်လႅၵ်ႈလၢႆႈၼင်ႇၵဝ်ႇ။ ၵူၼ်းႁေႃႈၵႃးၼၼ်ႉ ႁေႃႈပၼ်ႇမႃး ႁႂ်ႈပေႃးလႆႈၶဝ်ႈတၢင်းၾၵ်းတူဝၢင်းႁေႃ ၽၢႆႇဝၼ်းဢွၵ်ႇ။ မီးဝႆႉ မုထၢမ်းႁူမ်ႇလူမ်ႈၶဝ် ႁပ်ႉတွၼ်ႈပႂ်ႉထႃႈသေ တၵ်ႉယမ်ၶဝ်။ ၸဝ်ႈႁိူၼ်းၶမ်းၶဝ်ပူႇဢွၵ်ႇၵေႃႈ လူင်းၵႃးသေ ၶဝ်ႈမႃးၼႂ်းဝၢင်းႁေႃ။ ၵူၼ်းၼႂ်းႁေႃၶဝ် ႁၢင်ႈႁႅၼ်း ၵွင်မွင်းၶိူင်ႈတွႆႇတိုင်ႈ ၵူႊမဵဝ်းသေ ႁပ်ႉတွၼ်ႈ။ 

ထႅင်ႈဝၼ်း႞ ၸဝ်ႈၾႃႉ ဢွၼ်ၸဝ်ႈႁိူၼ်းၶမ်း ၼႄၼႂ်းႁေႃ ၵူႊတီႈ။ ႁေႃၼၼ်ႉ ႁၢၼ်ႉၼိူဝ် ဢဝ်မၢၵ်ႇဢုတ်ႇၵင်ႈဝႆႉ။ ၵမ်ႈပႃႈၼမ် ပဵၼ်ႁွင်ႈလုမ်း။ တႂ်ႈလၢင်ႈမၼ်းတႄႉ မီးဝႆႉ ႁွင်ႈၸိူဝ်းဢၼ်ဢဝ်လူၼ်ႈလဵၵ်းၵင်ႈဝႆႉ။ ပဵၼ်ဢွင်ႈတီႈ ဢၼ်ၵဵပ်းဝႆႉသိမ်းဝႆႉ ငိုၼ်းၶမ်းၽၼ်ႇတႃႇ ဢိၵ်ႇပႃး ၶူဝ်းၶွင် ဢၼ်ၸႂ်ႉတိုဝ်း ၼႂ်းပၢင်ၼႂ်းပွႆး လၢႆၸူဝ်ႈလၢႆပၢၼ် ၸိူဝ်းၼၼ်ႉ။ ပွင်းၸၢင်ႉၵေႃႈမီးယဝ်ႉ။ ၽုၼ်ႇမုၵ်ႉႁူမ်ႇတဵမ်ဝႆႉမူတ်း။ လုၵ်ႉတီႈၶူဝ်လႆၵႅပ်ႈၵႅပ်ႈဢွၼ်ႇသေ ၶိုၼ်ႈၵႂႃႇလႆႈထၢပ်ႈၼိူဝ်ႁေႃယူႇ။ ႁၢၼ်ႉၼိူဝ်ၼၼ်ႉ တေမီးႁွင်ႈယႂ်ႇႁွင်ႈလူင် သၢမ်ႁွင်ႈ ဢိၵ်ႇတင်း ႁွင်ႇဢၼ်လုၵ်ႈၸၢင်ႈၶဝ် ယူႇသဝ်း။ ႁွင်ႈလူင်ၽၢႆႇၼႂ်းတႄႉ ပဵၼ်ႁွင်ႈၸဝ်ႈၾႃႉ လႄႈ လုၵ်ႈလၢင်းၼၢင်းမေးၶဝ် ဝႆႈၽြႃး။ ႁွင်ႈၵၢင်ႁေႃတႄႉ ပဵၼ်ဢွင်ႈတီႈ ဢၼ်ၸဝ်ႈၾႃႉ ႁူပ်ႉထူပ်း ၶုၼ်သိုင်ႇၽွင်းမိူင်းၶဝ်သေ ၸီႉသင်ႇ ၵၢၼ်ပၢၼ်ႇမၢၼ်ႈပွင်မိူင်း။ ႁွင်ႈပလၢင်ႇႁူင်းသႅင်ၼၼ်ႉတႄႉ ပဵၼ်ဢွင်ႈတီႈ ဢၼ်ၸတ်းႁဵတ်းပၢင်ပွႆး။ လိူဝ်ၼႆႉ မီးႁွင်ႇသီႇႁွင်ႇ ဢၼ်တိတ်းၵၼ်ဝႆႉတင်း ႁေႃလူင်။ မီးၶူဝ်ၵၢႆႇၸူးၵၼ်ဝႆႉ။ ၸဝ်ႈႁိူၼ်းၶမ်း ႁူႉဝႆႉဝႃႈ ၼႂ်းႁွင်ႇသီႇႁွင်ႇ ႁွင်ႇ႞တႄႉပဵၼ် တီႈယူႇ မေးၸဝ်ႈၾႃႉ ၵေႃႉဢၼ်တိုၵ်ႉမီးဝႆႉ ၼႆယဝ်ႉ။ မိူဝ်ႈလဵဝ်တႄႉ ပႆႇလႆႈႁၼ်ၼႃႈႁၼ်တူဝ်မၼ်း။ 

လုၵ်ႉတီႈၸၢၼ်းႁေႃသေ ၸဝ်ႈႁိူၼ်းၶမ်း မုင်ႈတူၺ်းၵႂႃႇ ၼႂ်းဝၢင်းႁေႃ။ လႆႈႁၼ် ပၢင်ႇၽတ်ႉတႅၼ်းၼိတ်ႈ သီႇပၢင်ႇ၊ သူၼ်မွၵ်ႇၶမ်း၊ တူၼ်ႈပီးတွၵ်ႈ လႄႈ တူၼ်ႈမၢၵ်ႇၵႅင်း၊ ၶွၵ်ႈမႃႉ၊ သိုင်ႇဝႆႉၵႃး၊ သိုင်ႇမိုဝ်ႉ၊ တီႈယူႇသဝ်း လုၵ်ႈၸၢင်ႈ ၸိူဝ်းပႆႇမီးၼႃႈႁိူၼ်း။ လိူဝ်ၼႆႉ လႆႈႁၼ်ထႅင်ႈ သူၼ်မွၵ်ႇ ဢၼ်ႁၢင်ႊလီ တီႈၽၢႆႇႁွင်ႇ လႄႈ ၽၢႆႇၸၢၼ်းၼၼ်ႉယဝ်ႉ။ ၵႃၽိူၵ်ႇၼၼ်ႉ တၢႆၵႂႃႇႁိုင်ယဝ်ႉသေတႃႉ သႃလႃး ဢၼ်ဝႆႉၵႃၽိူၵ်ႇၼၼ်ႉ တိုၵ်ႉမီးဝႆႉယူႇ ၼႂ်းသူၼ်မွၵ်ႇၽၢႆႇၸၢၼ်း။ ပိူၼ်ႈလၢတ်ႈဝႃႈ ၵႃလမ်ၶဝ် ဢမ်ႇႁတ်းမႃး လိုဝ်ႈသဝ်းၼိူဝ်မုင်း သႃလႃးၵႃၽိူၵ်ႇၼၼ်ႉ ဝႃႈၼႆ။ တီႈၸဵင်ႇႁွင်ႇဝၼ်းဢွၵ်ႇ ႁေႃတႄႉ လႆႈႁၼ်မီးၵျွင်းၽြႃးလင်႞။ ၼႂ်းၼၼ်ႉ မီးႁုၼ်ႇႁၢင်ႊပုတ်ႉထၸဝ်ႈ သၢမ်သိပ်းပႅတ်ႇသူႇ။ တီႈႁိမ်း ၾၵ်းတူဝၢင်းႁေႃ ၽၢႆႇဝၼ်းဢွၵ်ႇၼၼ်ႉတႄႉ မီးဝႆႉႁေႃၽီယႂ်ႇယႂ်ႇလင်႞။ ၸဝ်ႈသူၺ်ႇတႅၵ်ႈ လၢတ်ႈဝႃႈ ပဵၼ်တီႈယူႇ ၽီပႂ်ႉမိူင်းယွင်ႁူၺ်ႈ ၼႆယဝ်ႉ။ ႁေႃၽီၼၼ်ႉ ၶႂ်ႈမိူၼ်ဝႆႉ ႁေႃမၢၼ်ႊ။ ယွၼ်ႉဝႃႈ ၽီၸဝ်ႈမိူင်းၼၼ်ႉ လုၵ်ႉမိူင်းမၢၼ်ႊ မႃးလႄႈ ၸင်ႇႁဵတ်းႁႂ်ႈမိူၼ်ႁေႃမၢၼ်ႊ ဝႃႈၼႆ။ ၽီၼၼ်ႉ မႃးႁွတ်ႈဝႆႉ ယွင်ႁူၺ်ႈ ၸဵမ်မိုၼ်ႉသိုၼ်းၵွၼ်ႇယဝ်ႉ။ မၼ်းလူလွမ်ၵႅတ်ႇၶေပၼ် ၸဝ်ႈၾႃႉလူင် ၵေႃႉဢၼ်လုၵ်ႉတီႈဝဵင်းမၢၼ်းတလေး ပၢႆႊလွတ်ႈမႃးဝႃႇ။ မိူဝ်ႈၵူၼ်းႁေႃၶမ်းမၢၼ်ႊၶဝ် လမ်းတီႉၸဝ်ႈၾႃႉလူင်၊ ၽီၼၼ်ႉ လပ်ႉသိူင်ႇတူဝ်ၸဝ်ႈၾႃႉဝႆႉပၼ် ၼႆယဝ်ႉ။ 

ၸဝ်ႈၾႃႉ လၢတ်ႈၼႄဝႃႈ ၵူၼ်းၼႂ်းဝဵင်းယွင်ႁူၺ်ႈၶဝ် မႃးလႆႈထိုင်ႁေႃၽီၼၼ်ႉ လွတ်ႈလွတ်ႈလႅဝ်းလႅဝ်းသေ မူးၸႃးလႆႈ၊ ပေႃးပဵၼ်ပီႊဢၼ် ၼမ်ႉယၢပ်ႇၵေႃႈ မႃးတဵၵ်းမႃးဢဝ်လႆႈ တီႈၼႂ်းဝၢင်းႁေႃ ၼႆယဝ်ႉ။ ၸဝ်ႈႁိူၼ်းၶမ်း ထွမ်ႇၸွမ်းတူၺ်းၸွမ်းသေတႃႉ ဢမ်ႇလၢတ်ႈၸွမ်းသင်သေၶေႃႈ။ ၸဝ်ႈႁိူၼ်းၶမ်း ၾၢင်ႉႁၼ်ၺႃး လုၵ်ႈၸၢင်ႈၶဝ် လုၵ်ႉတီႈတၢင်းၶဝ်ႈ ဝၢင်းႁေႃ ဢဝ်ၶူဝ်းၶွင်မၼ်း လႄႈ ၶူဝ်းတွၼ်ႈၶွင်ၾၢၵ်ႇ ပၢင်ၶႅၵ်ႇၸိူဝ်းၼၼ်ႉ တေႃႉၶဝ်ႈၵႂႃႇၼႂ်းႁေႃၼၼ်ႉယူႇယဝ်ႉ။ ၶူဝ်းတွၼ်ႈမၢင်ဢၼ်ၼၼ်ႉ မၼ်းယင်းပႆႇလႆႈတူၺ်းလႆႈႁၼ် လီလီၵွၼ်ႇယဝ်ႉ။ မိူဝ်ႈပၢင်ၶႅၵ်ႇယဝ်ႉၵေႃႈ တေႃႉတႄႉၸၢႆႉတႃတူၺ်း ၵွင်ၶူဝ်းတွၼ်ႈၸိူဝ်းၼၼ်ႉ ၵမ်း႞ၵွႆး ဢမ်ႇၸႂ်ႈႁိုဝ်။ 

ႁေႃလူင် ယွင်ႁူၺ်ႈ ဢၼ်မီးၸဵတ်းယွတ်ႈ ဢိၵ်ႇတင်းၶူဝ်လႆၼၵ်ႈၵႃးပႂ်ႉ

ၸၢတ်ႈပၢၼ် ၸဝ်ႈႁိူၼ်းၶမ်းၵေႃႈ လႆႈထုၵ်ႇဢူမ်ဢိုၼ် ၸိူင်ႉၼင်ႇ မႄႈမၼ်းယဝ်ႉ။ 

မိူဝ်ႈၶဝ်ၶဝ်ႈမႃးၼႂ်းႁွင်ႈလူင်ပလၢင်ႇႁူင်းသႅင်ၼၼ်ႉ ၸဝ်ႈႁိူၼ်းၶမ်း ထၢင်ႇဝႃႈ တူဝ်မၼ်း လႆႈပႆၶဝ်ႈမႃး ႁူးထမ်ႈလူင် ဢၼ်လပ်းသိင်ႇ၊ ဢၼ်ဢိုတ်းတၼ်ဝႆႉၼၼ်ႉယဝ်ႉ။ ၵူၺ်းၵႃႈ မၼ်းလႆႈႁၼ် ႁွင်ႈလူင် ဢၼ်ၵႂၢင်ႈပၢင်ႇသေ လႆႈသၢႆလႅင်း လီငၢမ်းဝႆႉၼၼ်ႉ။ ႁူးလႅင်းလူင်ၸိူဝ်းဢၼ်သႂ်ႇမၢၼ်ႇဝႆႉၼၼ်ႉ မီးပဵၼ်တႅဝ်း။ သၢႆလႅင်း ၼႃႈႁူဝ်ၾူၼ်ၵေႃႈ ထွင်ႇၶဝ်ႈမႃးဝႆႉသေ ႁၢင်ႊလီဝႆႉ။ ၸဝ်ႈႁိူၼ်းၶမ်း ပႆၸွမ်း သဝ်ႁေႃ ၸိူဝ်းဢၼ်တဵၵ်းၶမ်းဝႆႉၼၼ်ႉသေ ႁွတ်ႈၵႂႃႇတၢင်း ၽႃႁေႃ ၽၢႆႇဝၼ်းတူၵ်း။ တီႈၼၼ်ႉမီးဝႆႉ ၶဵင်ႇၽီ ဢၼ်တဵၵ်းၶမ်းဝႆႉ။ ၽီဢၼ်မီးဝႆႉၼႂ်းႁေႃၼႆႉ ဢမ်ႇၸႂ်ႈၽီပႂ်ႉမိူင်း ဢၼ်ယူႇဝႆႉ ၽၢႆႇၼွၵ်ႈႁေႃ။ ၽၢႆႇဝၼ်းဢွၵ်ႇၼၼ်ႉတႄႉ မီးဝႆႉ ၵူႇၶမ်း ဢၼ်ၸဝ်ႈၾႃႉၼင်ႈ လႄႈ ၸွင်ႈပဝ်းၸိူဝ်းၼၼ်ႉ တူပ်ႉဝႆႉ။ 

မိူဝ်ႈၽွင်းၼၼ်ႉ ၸဝ်ႈႁိူၼ်းၶမ်း ဝူၼ်ႉဝႃႈ ၼိူဝ်ႉလိူတ်ႈ၊ ထၢၼ်ႈၵူၼ်း လႄႈ ႁေႃၸဵတ်းယွတ်ႈ ၸိူဝ်းဢၼ် ယၢမ်ႈမတ်ႉၼွင်ႇမၼ်းဝႆႉၼႆႉ တၵ်းတေလႆႈပဵၼ် တႃႇၸၢတ်ႈပၢၼ်မၼ်း လႆႈလီလႆႈပဵၼ် ၼႆယဝ်ႉ။ ၸဵမ်မိူဝ်ႈပၢင်ၵူပ်ႉၵူႈသွၼ်ႉမိင်ႈယဝ်ႉတူဝ်ႈၵႂႃႇၼၼ်ႉ ၸဝ်ႈႁိူၼ်းၶမ်း ယၵ်ႉတူၺ်းၼႃႈၸဝ်ႈၽူဝ်မၼ်း ၵမ်းဢွၼ်တၢင်းသုတ်း။ ၸဝ်ႈသူၺ်ႇတႅၵ်ႈၼႆႉ မီးၶူၼ်တႃၼႃၼႃ၊ မီးသီႇသူပ်းယႂ်ႇယႂ်ႇလႄႈ မီးၼႃႈလုၵ်ႈဢွၼ်ႇ ဢၼ်ဢူႈမႄႈမၼ်း လဵင်ႉလူဝႆႉလီလီၼၼ်ႉယဝ်ႉ။ မၢၵ်ႇတႃမၼ်း ဢၼ်မီးၽၢႆႇလင်မၢၼ်ႇတႃမၼ်းတႄႉ လႅပ်ႈဢူၼ်ႈဢွၼ်ႇဝႆႉ။ ၸဝ်ႈႁိူၼ်းၶမ်း ႁူႉတူဝ်မႃးဝႃႈ မၼ်းတိုၼ်းဢမ်ႇၵူဝ် ၸဝ်ႈသူၺ်ႇတႅၵ်ႈ ၼႆယဝ်ႉ။ 

ၸဝ်ႈႁိူၼ်းၶမ်း လၢတ်ႈ ၸဝ်ႈသူၺ်ႇတႅၵ်ႈ လွႆးလွႆးဝႃႈ “ၶႃႈတေၶိုၼ်ႈၼင်ႈ ၼိူဝ်ပလၢင်ႇႁူင်းသႅင် ႁိမ်းၸဝ်ႈပီႈ။ ၶႃႈၸွမ်းမႃးၼႆႉ ဢမ်ႇၸႂ်ႈဝႃႈ တႃႇႁဵတ်းမေးၼွႆႉ” ၼႆယဝ်ႉ။ သဵင်မၼ်း ၸႅင်ႈလႅင်းလီ။ ဢမ်ႇၸႂ်ႈဝႃႈ လၢတ်ႈၽိတ်းလၢတ်ႈၽူၼ်။  

တေသိုပ်ႇထႅင်ႈ တွၼ်ႈ (႙) ၸၢတ်ႈပၢၼ်မႂ်ႇ

🦚 ၸွင်ႈပဝ်းငဝ်းႁေႃ/The White Umbrella (3rd Edition 2017)

လွင်ႈၼၢင်းယိင်းၵေႃႉ႞ ၸိုၼ်ႇႁတ်းၶတ်းတႃႉ တႃႇလွတ်ႈလႅဝ်းထၢင်ႇႁၢင်ႊ

🦚 Patricia W. Elliot တႅမ်ႈသေ ၶုၼ်ယုင်းၶဵဝ် ပိၼ်ႇတႅမ်ႈပဵၼ်လိၵ်ႈတႆး