ၵူၼ်းသူင်သိုၵ်း ၵူၼ်းႁၵ်ႉသိုၵ်း ၵူၼ်းပၢႆႈသိုၵ်း

 ၵူၼ်းသူင်သိုၵ်း ၵူၼ်းႁၵ်ႉသိုၵ်း ၵူၼ်းပၢႆႈသိုၵ်း

ၶၢဝ်းဢၼ်လပ်းသိင်ႇၸွမ်ႉႁွမ်ႉ၊ ဢၢႆႈငူဝ်ႉ ၵိုတ်းတရီးၵလွင်းမၼ်း တီႈႁိမ်းၵၢင်ႉၽိူင်း ၽၢႆႇၸၢၼ်းႁိူၼ်းၶဝ်ၶႅမ်ႉၶႅမ်ႉ။ 

မၼ်းၵႂႃႇသူင်ႇ ထူင်ၶဝ်ႈၵၢပ်ႇ ပီႈၸၢႆးလိူၼ်ၶဝ် ဝၢၼ်ႈတႂ်ႈ ထိုင်ၼႂ်းဝဵင်း။ မိူဝ်ႈၼႆႉ မၼ်းတၼ်းလႆႈသူင်ႇပၼ် ႁႃႈပွၵ်ႈ ၵမ်းလဵဝ်။ ၵူႊပွၵ်ႈတႄႉ မၼ်းဢမ်ႇတွၼ်ႉၶတ်းၸႂ်ၸိူင်ႉၼႆ ၼင်ႇၵဝ်ႇ။ ပီႊၼႆႉ ပီႈၸၢႆးလိူၼ်ၶဝ် ၵပ်းသိုပ်ႇထႅင်ႈ ၸဝ်ႈပွႆးယူင်ႇၵေႃႉမႂ်ႇ။ တီႈႁိူၼ်းၼၼ်ႉ မီးလုၵ်ႈယိင်းသၢဝ် ႁၢင်ႊလီႁၢင်ႊလဝ်းၵေႃႉ႞။ ၼႂ်းမၢၵ်ႇတႃ ဢၢႆႈငူဝ်ႉတႄႉ လဝ်းၼႃႇယဝ်ႉဝႃႈ။ ၼႆလႄႈ မၼ်းၸၢႆး ၶတ်းၸႂ်တေႃႉသူင်ႇ ထူင်ၶဝ်ႈၵၢပ်ႇ ပီးၸၢႆးလိူၼ်ၶဝ် တၼ်းလႆႈႁႃႈပွၵ်ႈၼၼ်ႉၼႃႇ။ ၶႂ်ႈလႆႈၼႃႈလႆႈတႃ တီႈပိူၼ်ႈ။ လုၵ်ႈယိင်း ၸဝ်ႈပွႆးယူင်ႇ ၸိုဝ်ႈဝႃႈ ဢေးၵျီႇၼၼ်ႉၵေႃႈ ၶႂ်ႈမိုတ်ႈၵၼ်တင်း ဢၢႆႈငူဝ်ႉမႃးသေ ၵႆႉၵႆႉဢွၵ်ႇမႃး ႁိုဝ်ႈပၼ် ၼမ်ႉယိုဝ်ႉဝႃႇ၊ တၵ်ႉဝႃႈ “လိုဝ်ႈႁေၵွၼ်ႇလႄႈ ပီႈငူဝ်ႉ” ဝႃႇ၊ ၵမ်း႞သမ်ႉ ယုမ်ႉၼႄႁေဝႃႇ။ ထုၵ်ႇမၢၵ်ႇႁူဝ်ၸႂ် ဢၢႆႈငူဝ်ႉတေႉယဝ်ႉ ၵမ်းၼႆႉ။ တႄႇမိူဝ်ႈၼၼ်ႉ ဢၢႆႈငူဝ်ႉ ၵႂႃႇဝဵင်းမိူဝ်ႈလႂ်ၵေႃႈ ၵျေႃႇတေႉယဝ်ႉ။ ႁႃႁူးႁႃႁွႆးၵႂႃႇယူႇတိၵ်းတိၵ်း။ ပီႈၸၢႆးလိူၼ် ယင်းတၵ်ႉဝႃႈ “ဢၢႆႈငူဝ်ႉ မိူဝ်ႈၼႆႉ မႂ်းၵႆႉၵျႃႉလႃႇ တၼ်းပဵၼ် ႁႃႈပွၵ်ႈ၊ ၵူႊပွၵ်ႈသွင်သၢမ်ပွၵ်ႈ ပေႃးၶင်းၼႃႇယဝ်ႉ” ၼႆၵွၼ်ႇ။

ႁိူၼ်းဢၢႆႈငူဝ်ႉၶဝ်ၼႆႉ မီးတရီးၵလွင်းဢွၼ်ႇလမ်း႞။ ဢၢႆႈငူဝ်ႉ ပဵၼ်ၵေႃႉႁေႃႈ ၵိၼ်ၸၢင်ႈတေႃႉသူင်ႇပၼ်ပိူၼ်ႈ ဝၢၼ်ႈတႂ်ႈၼႃးၼိူဝ်။ ၶဝ်ႈၵၢပ်ႇလႂ်၊ ၶဝ်ႈပိူၵ်ႇလႂ်၊ ထူဝ်ႇလိၼ်လႂ်၊ တႅင်လႂ် ၸိူဝ်းၼႆႉ။ မၢင်ပွၵ်ႈ လႆႈၵိၼ်ၸၢင်ႈတေႃႉမႆႉ ၼႂ်းထိူၼ်ႇၵေႃႈ မီးယဝ်ႉ။ ပေႃးထိုင်ၶၢဝ်းၼၼ်ႉတႄႉ လႆႈၵႂႃႇသူင်ႇထိုင် ၽင်ႇၶူင်းၵေႃႈ မီးယဝ်ႉ။ မၢင်ပွၵ်ႈ လႆႈဢဝ်မႆႉတၢင်း မိူင်းမိတ်ႈသူင်ႇထိုင် တၢင်းမၢၼ်ႈဝဵင်းလူင် ထုင်ႉလွႆႁူဝ်သိူဝ်ၼၼ်ႉ ၵွၼ်ႇယဝ်ႉ။ ၵူၺ်းၵႃႈ မႄႈဢၢႆႈငူဝ်ႉၶဝ် ဢမ်ႇၶႂ်ႈပၼ်ၵႂႃႇၵိၼ်ၸၢင်ႈ တၢင်ႇမႆႉၸိူင်ႉၼၼ်။ မႄႈၶဝ် မႆႈၸႂ်ၸွမ်းၼၼ်ႉၼႃႇ။ ၵွပ်ႈၼႆ ၸူဝ်ႈၼႂ်းမိူင်းတႆးပွတ်းႁွင်ႇ သုၵ်ႉသၢၵ်ႉမႃးၼႆ့ ဢၢႆႈငူဝ်ႉ ဢမ်ႇသူႈလႆႈၵႂႃႇတၢင်းၵႆ။ လႆႈၵိၼ်ၸၢင်ႈ တေႃႉသူင်ႇ ဝၢၼ်ႈတႂ်ႈၼႃးၼိူဝ် မိူၼ်လၢတ်ႈမိူဝ်ႈၵႆႈယဝ်ႉ။

ဢၢႆႈငိူဝ်ႉ ၵိုတ်းၵႃးတရီၵလွင်းမၼ်းယဝ်ႉၵေႃႈ မႃးႁႃဢၢပ်ႇၼမ်ႉ ၼႂ်းၵႄးၽၢႆႇလင်ႁိူၼ်းၶဝ် ဢၼ်ၶဵဝ်ၸိဝ်းငိဝ်းသေ ၼိမ်ၸိုင်ႈၸိုင်ႈဝႆႉၼၼ်ႉ။ ၽိူဝ်ႇဢၢပ်ႇယဝ်ႉၵေႃႈ ဢၼ်လႆႈႁိူဝ်ႉမႃးတင်းဝၼ်းၼၼ်ႉၵေႃႈ ႁၢႆမူတ်း။ မႃးပုတ်ႈလၢႆႈ ၶူဝ်းၼုင်ႈ ယဝ်ႉႁေၵေႃႈ ၶဝ်ႈမႃးႁႃၵိၼ်ၶဝ်ႈၼႂ်းသိုင်ႇၾႆး။ မႄႈဢၢႆႈငူဝ်ႉၶဝ် ဢိၵ်ႇတင်း ပီႈဢၢႆႈလူင်ၶဝ် ပူႇဢွၵ်ႇတႄႉ ၵိၼ်ယဝ်ႉယဝ်ႉၼႃႇၶၢဝ်းၼႆႉ။ ထိုင်ၵၢင်ၶမ်ႈ ၇ မူင်းယဝ်ႉၼႃႇ။ ဢၢႆႈငူဝ်ႉ မီးၾိင်ႈယၢမ်ႈမဵဝ်း႞။ ပေႃးတေၵိၼ်ၶဝ်ႈၼႆ ဢဝ်ၶဝ်ႈဢဝ်ၽၵ်းသႂ်ႇလေႃးၵၼ် ၼႂ်းဢၢင်ႇလူင် မႃးၼင်ႈၽၢႆႇၼႃႈ ထီးဝီးသေ ၵိၼ်ၼၼ်ႉယဝ်ႉ။ ၸူဝ်ႈဝၢၼ်ႈၶဝ် လႆႈၾႆးၾႃႉသေ ပီႈဢၢႆႈလူင်ၶဝ် သိုဝ်ႉမႃးထီးဝီးလူင်လုၵ်ႈ႞ၼႆႉ ဢၢႆႈငူဝ်ႉ ၸူမ်းဝႃႈၸူမ်းတေႉတေႉ။ မိူဝ်ႈၶဝ်ၵေႃႉလဵၵ်ႉၼၼ်ႉ ဢမ်ႇမီးထီးဝီး တီႈႁိူၼ်းလူး။ ပေႃးၶႂ်ႈတူၺ်း လႆႈၵႂႃႇတီႈယူင်ႇဝီးတီးဢူဝ်း ႁူဝ်ဝၢၼ်ႈၼၼ်ႉ။ ၼိုင်ႈၵေႃႉလႂ် လႆႈပၼ်ၼိုင်ႈပျႃး ၼၼ်ႉၼႃႇ။

ဢၢႆႈငူဝ်ႉၼႆႉ မၼ်းသူင်တူၺ်း ၸိူင်းငဝ်းသိုၵ်းတေႉတေႉယဝ်ႉ။ ၸဵမ်မိူဝ်ႈလဵၵ်ႉၼၼ်ႉ ပေႃးဝႃႈ ပိူၼ်ႈၼႄ ၸိူင်းဢၼ်ပိူၼ်ႈ ယိုဝ်းၵၼ်ၽၼ်းၵၼ်ၼႆၸိုင် မၼ်းဢမ်ႇပၼ်လွတ်ႈသေပွၵ်ႈ။ ၵႂႃႇတူၺ်း တီႈယူင်ႇဝီးတီးဢူဝ်း ႁူဝ်ဝၢၼ်ႈ ၵူႊပွၵ်ႈယဝ်ႉ။ ပေႃးလဵၼ်ႈၸွမ်းၵၼ်တင်း တႆးၵေႃႉၵေႃႈ ၶဝ်ၵႆႉလဵၼ်ႈယိုဝ်းၵွင်ႈၵၼ်ယဝ်ႉ။ မိူဝ်ႈပၢၼ် ဢၢႆႈငူဝ်ႉၶဝ် ၵေႃႉလဵၵ်ႉၼႆႉ ဢမ်ႇမီး ၵွင်ႈၵေႃႇ မိူၼ်ပၢၼ်ၼႆႉလေႃႇ။ မီးၵေႃႈ ၵႃႊၼႃႇလူး။ ဢူႈမႄႈၶဝ် ဢမ်ႇၸၢင်ႊသိုဝ်ႉပၼ်။ ဢၢႆႈငူဝ်ႉၶဝ် တႆးၵေႃႉတင်းၸုမ်း ဢဝ်ၾႃႉထၢၵ်ႇၶႅၵ်းမႆႉ ႁဵတ်းပဵၼ်ႁၢင်ႊၵွင်ႈယဝ်ႉ ဢဝ်သူပ်းယိုဝ်းၵၼ် ပၢင်ႉ ပၢင်ႉ ပၢင်ႉ ၼၼ်ႉၼႃႇ။ သူင်ၼႃႇလူး။ ၽိူဝ်ႇပဵၼ် မၢဝ်ႇထႅဝ်ႇဢွၼ်ႇယဝ်ႉၵေႃႈ သူင်ၼုင်ႈၵူၼ်ၶဵဝ်ၵူၼ်လၢႆး၊ သိူဝ်ႈၶဵဝ်သိူဝ်ႈလၢႆး၊ မၢၵ်ႇႁူဝ်ၶဵဝ် မၢၵ်ႇႁူဝ်လၢႆး ၸိူဝ်းၼၼ်ႉၼႃႇ။ သွၵ်းတိၼ်ၶဵဝ်ၼၼ်ႉတႄႉ ၵူၼ်းဝၢၼ်ႈၼွၵ်ႈၼႃးပၢင်ႇႁဝ်း တိုဝ်းၵူႊၵေႃႉလႄႈ ဢၢႆႈငူဝ်ႉၶဝ်ၵေႃႈ တိုဝ်းတႃႇသေႇယဝ်ႉ။

ၽိူဝ်ႇတီႈႁိူၼ်းၶဝ် မီးထီးဝီးမႃးၵေႃႈ မၼ်းႁႃသိုဝ်ႉ ၽႅၼ်ႇသီးတီး ဢၼ်ပႃးၸိူင်းငဝ်းသိုၵ်းၼမ်ၼမ်သေ မႃးတူၺ်း တီႈႁိူၼ်း။ ၸိူင်းငဝ်းသိုၵ်းလုမ်ႈၾႃႉပွၵ်ႈသွင် ဢၼ်ဢမႄႇရီႇၵၼ်ႇ၊ ၵျႃႇမၼီႇ၊ ၵျႃႇပၢၼ်ႇၶဝ် ယိုဝ်းၵၼ်ၼၼ်ႉၵေႃႈ မၼ်းတူၺ်း၊ ၸိူင်းငဝ်းဢမႄႇရီႇၵၼ်ႇတင်း ဝႅတ်ႉၼၢမ်း ယိုဝ်းၵၼ်ၼၼ်ႉၵေႃႈ တူၺ်းယဝ်ႉ။ ၸိူင်းငဝ်း ဢၼ်ၶႄႇၽၼ်းၵၼ်ၼၼ်ႉၵေႃႈ မၼ်းတူၺ်းယဝ်ႉ။ ၸိူင်းၵူၼ်းလဵင်ႉဝူဝ်း ဢမႄႇရီႇၵၼ်ႇ ဢၼ်ပိူၼ်ႈႁွင်ႉဝႃႈ ၶၢဝ်းပွႆး (Cowboy) ၼၼ်ႉၵေႃႈ မၼ်းသူင်တူၺ်းယဝ်ႉ။ သင်ဝႃႈ သႂ်ႇၶဝ်ႈၽၵ်း ၼႂ်းဢၢင်ႇလူင်သေ လႆႈတူၺ်းၸိူင်းငဝ်းသိုၵ်းၼႆ ၸေးၸိမ်ႇလူင် မိူင်းၵူၼ်း ပုၼ်ႈတႃႇ ဢၢႆႈငူဝ်ႉယဝ်ႉ။ ဢဝ်ဢီႈသင်မႃးလႅၵ်ႈၵေႃႈ ဢမ်ႇလႆႈၵွၼ်ႇ။

မိူဝ်ႈၼႆႉၵေႃႈ ဢၢႆႈငူဝ်ႉ ၵွၼ်ႉၶဝ်ႈ သႂ်ႇၼႂ်းဢၢင်ႇလူင်၊ ႁၼ်ၽၵ်းၵၢတ်ႇၵႅင်ႁေၵေႃႈ တၵ်းသႂ်ႇလေႃးၶဝ်ႈပႅတ်ႈ၊ ၼမ်ႉၽိတ်ႉၶိင်ၼၼ်ႉၵေႃႈ သႂ်ႇလေႃးပႅတ်ႈၵမ်းလဵဝ်။ ၵမ်းလိုၼ်းသုတ်းတႄႉ ဢဝ်ၼိူဝ်ႉယွင်းၶူဝ်ႈ သႂ်ႇမႃးသေ ဢွၵ်ႇမႃး ၼႂ်းၵၢင်ႁိူၼ်း တီႈဢၼ်ဝႆႉ ထီးဝီးၼၼ်ႉ။ ပဵၼ်ၶၢဝ်းဢၼ် လုၵ်ႈဢွၼ်ႇၶဝ် ၸိူဝ်းပဵၼ် လၢၼ်ယိင်းလၢၼ်ၸၢႆးမၼ်း ၵႆႉမႃးႁိမ်မၼ်းတူၺ်းထီးဝီးၼၼ်ႉ ၵုမ်ႇမိုင်ႉလႆႈဢၢၼ်ႇလိၵ်ႈၵျၢၵ်ႈလိၵ်ႈ တႃႇတေတွပ်ႇလိၵ်ႈယူႇလႄႈ ဢၢႆႈငူဝ်ႉ ထၢင်ႇႁၢင်ႊ ၵိၼ်ၶဝ်ႈႁေ တူၺ်းၸိူင်းငဝ်းယူႇယဝ်ႉ။ တေဢမ်ႇမီးၽႂ်မႃးၵဝ်းမၼ်း။ သင်ဢမ်ႇၼၼ်တႄႉ မၼ်းသမ်ႉၶႂ်ႈတူၺ်း ၸိူင်းသိုၵ်း၊ လၢၼ်ယိင်း လၢၼ်ၸၢႆးမၼ်းသမ်ႉ ၶႂ်ႈတူၺ်းၸိူင်း ၵႃႇတုၼ်း ၼူလႄႈမႅဝ်း ဢၼ်ၸုမ်းတႆးၵေႃႉလီၶဝ် ပိၼ်ႇသဵင်။ ၶဝ်ၼႃႉလၢၼ် လႆႈၽိတ်းၵၼ် မေႃးၵၼ်တႃႇသေႇယဝ်ႉ။

ၸိူင်းငဝ်းၼိုင်ႈႁူဝ်ၼႆႉ မၼ်းၵႆႉႁိုင် မွၵ်ႈၼိုင်ႈၸူဝ်ႈမူင်းၶိုင်ႈ။ ၸိူင်းငဝ်း ယင်းပႆႇတူၵ်းၶိုင်ႈ ဢၢင်ႇၶဝ်ႈဢၢႆႈငူဝ်ႉၼႆႉ ပေႃးၵဵင်ႈလိူၼ်ႈပႅတ်ႈယဝ်ႉ။ ၵိုတ်းပႅတ်ႈၸိူင်းငဝ်းၼၼ်ႉ ၵမ်း႞ႁေ ၵႂႃႇသႂ်ႇၶဝ်ႈသႂ်ႇၽၵ်းထႅင်ႈသေ မႃးသိုပ်ႇတူၺ်းၸိူင်းငဝ်း။ ၸိူင်းငဝ်း ဢၼ်ဢၢႆႈငူဝ်ႉ ၼင်ႈတူၺ်းယူႇ မိူဝ်ႈလဵဝ်ၼႆႉ ပဵၼ်ၸိူင်းငဝ်း လွင်ႈၶႄႇၽိူၵ်ႇ (ၵျႅင်းၸႄႉသျီ) လႄႈ ၶႄႇလႅင် (မၢင်ၸိုဝ်တူင်း) တိုၵ်းၵၼ်ၼၼ်ႉၼႃႇ။ ပဵၼ်လွင်ႈဢၼ်တေႉတေႉ ၼၼ်ႉယဝ်ႉ။ ၽိူဝ်ႇၸိူင်းသုတ်းသေ ဢၢႆႈငူဝ်ႉ မႃးလၢင်ႉဢၢင်ႇၶဝ်ႈမၼ်းသေ လၢတ်ႈဢွၵ်ႇသူပ်းဝႃႈ “ၶႄႇၼႆႉ ငိူဝ်ႈတေႉမႂ်း၊ ၶဝ်ၼင်ႇၵၼ်ၵေႃႈ တိုၵ်းၵၼ် ၵူၼ်းပေႃးတၢႆၸွမ်း ႁူဝ်လၢၼ်ႉမၼ်းဝႃႇ” ၼႆၵွၼ်ႇ။

ၽိူဝ်ႇဢိမ်ႇတွင်ႉယဝ်ႉၵေႃႈ ဢၢႆႈငူဝ်ႉ လၢၵ်ႈၾူၼ်းမိုဝ်းထိုဝ်မၼ်း ဢၼ်ႁဵတ်းဢွၵ်ႇမႃး မိူင်းၶႄႇၼၼ်ႉသေ ဢၢၼ်းႁႃလဵၼ်ႈတူၺ်း ၾဵတ်ႉပုၵ်ႉ။ ၸိုဝ်ႈၾဵတ်ႉပုၵ်ႉ ဢၢႆႈငူဝ်ႉ ပဵၼ်သင် ၼႆႁႃႉ။ ဢၢႆႈငူဝ်ႉ ဢမ်ႇငိူဝ်ႈလေႃႇ။ ဢၢႆႈငူဝ်ႉ ဢမ်ႇတၢင်ႇၸိုဝ်ႈမၼ်း ၼႂ်းၾဵတ်ႉပုၵ်ႉဝႃႈ ပဵၼ် “ဢၢႆႈငူဝ်ႉ”။ မၼ်းတၢင်ႇဝႃႈ “ ငွႆးတင်ႈလမ် ၼိူဝ်ၵဵင်းၾႆး “ ၼႆၼႃႇ။ ဢၢႆႈငူဝ်ႉ လႆႈၸႂ် ၽဵင်းၸၢႆးမူး “ငွႆးတင်ႈလမ်” ၼၼ်ႉႁေ တၢင်ႇဝႆႉ ၸိူင်ႉၼႆ။ ဢီႈသင်ၶႃႈၵေႃ? ဢမ်ႇမိူၼ်ၸိုဝ်ႈၵူၼ်းၼႆၶႃႈႁႃႉ။ ၵၢပ်ႈပၢၼ်မိူဝ်ႈလဵဝ် ပိူၼ်ႈတၢင်ႇၸိုဝ်ႈ ၼိူဝ်ၾဵတ်ႉၼႆႉ ၸိုဝ်ႈၸိူင်ႉၼႆ လၢႆလၢႆယဝ်ႉ။

ဢၢႆႈငူဝ်ႉ မႃးၼင်ႈၼိူဝ် တင်ႇငႅၵ်ႈ ၽၢႆႇၼႃႈႁိူၼ်း တီႉလၢႆႉ တီႉလၢႆႉ ႁေၵမ်း႞။ တႆးၵေႃႉမၼ်း ထူဝ်းၾူၼ်းၶဝ်ႈမႃး။ ဢၢႆႈငူဝ်ႉ ထၢမ် “ဢီႈသင်လႃႇ ဢၢႆႈထူဝ်ႉ”

“ဢၢႆႈငူဝ်ႉ မႂ်းဢမ်ႇတၼ်းႁႃႉ၊ ႁႃးမႃးမီးတီႈ သႅင်ႇဢေးသူၺ်ႇၶဝ်ၼေႈ၊ ၵူၼ်းၶႂ်ႈၸေးဝႆႉမႂ်း။ ဢၢႆႈၵုၵ်းၶဝ် ဝၢၼ်ႈၼိူဝ်ၵေႃႈ ၽႅဝ်ဝႆႉ၊ ဢွၵ်ႇမႃးလႄႈ သြႃႇၵေႃႉ၊ ႁဝ်းၵုမ်းၵၼ်ၵႂႃႈ”

ပေႃးဝႃႈ ငိၼ်းၸိုဝ်ႈ ဢေးသူၺ်ႇ ၼႆၵေႃႈ ႁူဝ်ဢၢႆႈငူဝ်ႉ တင်ႈပိုၵ်းယိုၵ်းမႃးၵမ်းလဵဝ်။ ဢေးသူၺ်ႇၶဝ်ၼႆႉ ပိုတ်ႇဝႆႉသႅင်ႇတၢင်းၵိၼ် တီႈၸေးတၢၼ်း။ သႃႈၶူမ် လႄႈ တပ်းလူႈ ပႃႈသႃႇ မႄႈဢေးသူၺ်ႇၶဝ်ၼႆႉ ၸိုဝ်ႈယႂ်ႇဝႆ့ ၼႂ်းတူင်ႇတၢင်ႇၼႆႉ ၼင်ႇၵဝ်ႇ။ ၸဵမ်မိူဝ်ႈပၢၼ်ဢူႈဢၢႆႈငူဝ်ႉၶဝ် လုင်းဢၢႆႈငူဝ်ႉၶဝ်ၸိူဝ်းၼႆႉ ၵႆႉၵႂႃႇၼင်ႈၵိၼ် သႅင်ႇပႃႈသႃႇၶဝ်၊ မိူဝ်ႈၼၼ်ႉတႄႉ ပဵၼ်ဢေးသႃႇ ၼႆၵႂႃႈ။ ႁၢင်ႊလီမိူၼ်လုၵ်ႈယိင်းမၼ်း ဢေးသူၺ်ႇၶဝ် မိူဝ်ႈလဵဝ်ယဝ်ႉ။ ၸုမ်းဢၢႆႈငူဝ်ႉၶဝ် ဢၢႆႈထူဝ်ႉၶဝ် ဢၢႆႈၵုၵ်းၶဝ်ၼႆႉ ဢမ်ႇတၼ်းႁူႉဝႃႈ ၼမ်ႉလႅမ်ႉ သႃႈၶူမ်တပ်းလူႈ၊ ပိူင်ယႂ်ႇမၼ်း ၵႂႃႇတူၺ်း တၢင်းႁၢင်ႊလီ ဢေးသူၺ်ႇႁေ ႁႃလၢႆးတၢင်း တႃႇၵဝ်းၵၼ်ၵွႆး။

ၵွပ်ႈၼႆ ၽိူဝ်ႇငိၼ်းၸိုဝ်ႈ ဢေးသူၺ်ႇ ၼႆၵေႃႈ ၼႃႈဢေးၵျီႇ လုၵ်ႈယိင်းၸဝ်ႈပွႆးယူင်ႇ မိူဝ်ႈၵၢင်ဝၼ်းၼၼ်ႉၵေႃႈ ႁၢႆလၢႆၵႂႃႇႁေ ၶႂ်ႈလုၵ်ႉလႅၼ်ႈၵႂႃႇၵမ်းလဵဝ်ယဝ်ႉ။ ၵူၺ်းၵႃႈ လႆႈသိုပ်ႇငိၼ်းဝႃႈ ဢၢႆႈၵုၵ်းၶဝ်ၵေႃႈ ၽႅဝ်ဝႆႉၼႆလႄႈ ဢၢႆႈငူဝ်ႉ ဢမ်ႇမီးၸႂ် ၶႂ်ႈၵႂႃႇသေဢိတ်း။ ဢၢႆႈငူဝ်ႉ တင်း ဢၢႆႈၵုၵ်းၼႆႉ ဢမ်ႇၸႂ်ႈဝႃႈ ပဵၼ်ၵူၼ်းႁိမ်ၸူႉၵၼ်။ မိူဝ်ႈၸဝ်ႉ ဢၢႆႈငူဝ်ႉ တၢင်း ဢၢႆႈၵုၵ်း ပဵၼ်ဢူၺ်းၵေႃႉႁၵ်ႉၵၼ်ၵွၼ်ႇယဝ်ႉ။ သူင်သိုၵ်းယွင်ႇသိုၵ်း မိူၼ်ၵၼ်။ မိူဝ်ႈလႅၼ်ႈၵႂႃႇတူၺ်း ဝီးတီးဢူဝ်း ၸိူင်းသိုၵ်း တီႈႁူဝ်ဝၢၼ်ႈၵေႃႈ ၵႂႃႇၸွမ်းၵၼ်။ ပေႃးဢဝ်ၵွင်ႈမႆႉ ယိုဝ်းလဵၼ်ႈၵၼ်ၵေႃႈ ၶႃဢၢႆႈၵုၵ်း ယူႇၽၢႆႇလဵဝ် ၸုမ်းလဵဝ်ၵၼ်မႃးၵွၼ်ႇ။ ၵူၺ်းၵႃႈ ၼႂ်းပီႊ႞သွင်ပီႊၼႆႉ ဢၢႆႈငူဝ်ႉတင်းဢၢႆၵုၵ်း ဢမ်ႇပေႃးထုၵ်ႇမေႃပေႃးၵႂၢမ်းၵၼ်။ မီးသိုၵ်းသွင်ၸုမ်းၵေႃႈ ဢၢႆႈငူဝ်ႉ ႁၼ်လီ သိုၵ်းၸုမ်း႞၊ ဢၢႆႈၵုၵ်းသမ်ႉ ႁၼ်လီ သိုၵ်းထႅင်ႈၸုမ်း႞။ ပေႃးၺႃးၵၼ်ၵေႃႈ ဢုပ်ႇၵၼ်ထဵင်ၵၼ်။ သိုၵ်းၵဝ်လီ၊ သိုၵ်းမႂ်းၵႅၵ်း ၼႆ တိၵ်းတိၵ်းယဝ်ႉ။ ဝႃႈတေႉၵေႃႈ ဢၢႆႈငူဝ်ႉၵေႃႈ ဢမ်ႇၸႂ်ႈသိုၵ်း၊ ဢၢႆႈၵုၵ်းၵေႃႈ ဢမ်ႇၸႂ်ႈသိုၵ်း။ ၶဝ်ႁၵ်ႉသိုၵ်းၸုမ်းဢၼ်ၶဝ် ႁၼ်လီၼၼ်ႉယဝ်ႉ။ ၸူဝ်ႈသိုၵ်း သွင်ၸုမ်း ၶဵင်ႈၶႅင်တိုၵ်းတေႃးၵၼ်မႃး တၢင်းၸေႊဝဵင်း ဢၼ်ၸမ်တင်း ၸေႊဝဵင်း ဢၢႆႈငူဝ်ႉၶဝ်ၼႆႉ ဢၢႆႈငူဝ်ႉ တၢင်း ဢၢႆႈၵုၵ်း တူၺ်းၼႃႈၵၼ်ၵေႃႈ ဢမ်ႇလႆႈယဝ်ႉ။

“ဢမ်ႇလႆႈႁၼ်ၼႃႈ ဢေးသူၺ်ႇၵေႃႈယဝ်ႉ၊ ဢမ်ႇလႆႈၵိၼ်လဝ်ႈ ၵုမ်းၸိူဝ်းသူၵေႃႈယဝ်ႉ ၵဝ်ဢမ်ႇၶႂ်ႈႁၼ်ၼႃႈ ဢၢႆႈၵုၵ်း” ၼႆသေ ဢၢႆႈငူဝ်ႉ ဝၢင်းၾူၼ်းပႅတ်ႈ။ ၵူဝ်ဢၢႆႈထူဝ်ႉ ထူဝ်းႁႃမႃးထႅင်ႈလႄႈ မွတ်ႇပႅတ်ႈၾူၼ်းမိုဝ်းထိုဝ်မၼ်းသေ တမ်းဝႆႉၼိူဝ်ၽိူၼ် ၶဝ်ႈၼႂ်းၽႃႈသေ ၼွၼ်းၸဝ်ႉၸဝ်ႉယဝ်ႉ။ ၶမ်ႈၼၼ်ႉ ဢၢႆႈငူဝ်ႉ ဢမ်ႇၼွၼ်းလမ်းငၢႆႈငၢႆႈ။ ၵမ်း႞ႁၼ်ၼႃႈ ဢေးသူၺ်ႇ၊ ၵမ်း႞ ႁၼ်ၼႃႈ ဢေးၵျီႇ၊ ၵမ်း႞ ႁၼ်ၼႃႈ ဢၢႆႈၵုၵ်းႁေ။ လိုၵ်းတၢၼ်ႇတၢၼ်ႇယဝ်ႉၸင်ႇ လပ်းၵႂႃႇ။

“ပိုင်ႉ ပိုင်ႉ” ငိၼ်းသဵင်မၢၵ်ႇတႅၵ်ႇႁႅင်းႁႅင်း တီႈဢၼ်ႁၢမ်ႉၵႆဢိတ်း႞လႄႈ ဢၢႆႈငူဝ်ႉ တိုၼ်ႇမႃး။ ငိၼ်းပႃး သဵင်ၵွင်ႈ ယိုဝ်းထပ်းၵၼ် ပၢင်ႉ ပၢင်ႉ ၼႆထႅင်ႈ။ ဢၢႆႈငူဝ်ႉ တိုၵ်ႉထၢင်ႇဝႃႈ ၵဝ်တူၺ်းၸိူင်း ၼမ်ၼႃႇလႄႈ ၽၼ်ႁၼ်ပႃးႁိုဝ် ၼႆၵွၼ်ႇ။

“ဢၢႆႈၼွင်ႉ! ႁဵတ်းႁင် မႂ်းဢမ်ႇလုၵ်ႉမႃးလႃႇ?” ငိၼ်းသဵင် ပီႈဢၢႆႈၶဝ် ႁွင်ႉလႄႈၸင်ႇ ဢၢႆႈငူဝ်ႉ ႁူႉတူဝ်တိုၼ်ႇမႃးတေႉတေႉ။ ၽိူဝ်ႇမၼ်း ၵၢၼ်းဢွၵ်ႇၽႃႈ ၽႅဝ်မႃးၼႂ်းၵၢင်ႁိူၼ်း လႆႈႁၼ် မႄႈဢၢႆႈငူဝ်ႉၶဝ် မူပ်ႇဝႆႉၼိူဝ်လိၼ် တီႈၸွၵ်ႉႁိမ်းၶဵင်ႇၽြႃး။ ဢၢႆႈငၢဝ်ႈဢွၼ်ႇ ႁိမ်ထီးဝီး တီႈဢၢႆႈငူဝ်ႉသေ တူၺ်း ၼူလႄႈမႅဝ်းၼၼ်ႉၵေႃႈ ၵွတ်ႇမႄႈၶဝ် ၵေႃႉပဵၼ်ပီႈလူဝ်း ဢၢႆႈငူဝ်ႉၶဝ်ဝႆႉ။ ဢေးလိူၼ်တႄႉ ၵွတ်ႇဢူႈၶဝ် ပီႈဢၢႆႈ ဢၢႆႈငူဝ်ႉသေ ဢမ်ႇႁတ်းငွၵ်ႈႁူဝ်သေဢိတ်း။ ဢၢႆႈငူဝ်ႉၵေႃႈ ၵႂင်ပူၵႂင်ပႃ ၼင်ႈလူင်းၼိူဝ်လိၼ် ၵူင်ႇယူင်ႇၵၢင်ႇယၢင်ႇ။ သဵင်ၵွင်ႈ သဵင်ပွမ်းၵေႃႈ လင်မႃးတေႉတေႉ။ ၽိူဝ်ႇဢၢႆႈငူဝ်ႉၾၢင်ႉတူၺ်း မူင်းယၢမ်း ဢၼ်ၽႅၼ်ႁွႆႈဝႆႉ တီႈၽႃၼၼ်ႉ လႆႈႁၼ်ၸီႉၼႄဝႆႉ တီႈတူဝ်ၼပ်ႉ ၄ လႄႈ တူဝ်ၼပ်ႉ ၂၅။ ၵူၼ်းၼႂ်းႁိူၼ်း ဢၢႆႈငူဝ်ႉ ၵႃႊလႆႈမူပ်ႇယူႇ ၼိူဝ်လိၼ် ၼႂ်းၵၢင်ႁိူၼ်း တေႃႇပေႃးမိူင်းလႅင်းယဝ်ႉ။ ၽိူဝ်ႇမိူင်းလႅင်းမႃးမိင်မိင်ၵေႃႈ သဵင်ၵွင်ႈၸိူဝ်းၼၼ်ႉ ထၢတ်ႇၵႂႃႇယဝ့်။

ယဵၼ်ၵႂႃႇယဝ်ႉ ႁိုင် ၁၀ မီႉၼိတ်ႈယဝ်ႉ ပီႈဢၢႆႈ ဢၢႆႈငူဝ်ႉၶဝ် ဝႃႈႁင်းမေးမၼ်းဝႃႈ “မႄႈလိူၼ်ၶဝ် သိမ်းၶူဝ်းသိမ်းလဵင်း၊ တႃႇမႄႈႁဝ်း တင်းလုၵ်ႈဢွၼ်ႇၶဝ်လႄႈ။ ယႃႇပေလိုမ်းၽႃႈႁူမ်ႇလႃႈ။ ပေႃးၽႅဝ်ၼႂ်းဝဵင်း ပိူၼ်ႈတေပၼ်လႆႈ ဢမ်ႇပၼ်လႆႈ ဢမ်ႇၸၢင်ႊဝႃႈ၊ ႁဝ်းပႃး ၵူၼ်းထဝ်ႈ လႄႈ လုၵ်ႈဢွၼ်ႇ။ ပႃးၵႂႃႇႁင်းႁဝ်းလီသေပိူၼ်ႈယဝ်ႉ”

ယဝ်ႉၵေႃႈ ဝၢႆႇၸူး ဢၢႆႈငူဝ်ႉသေ “ဢၢႆႈၼွင်ႉ မႂ်းၵႂႃႇႁႅၼ်းၵႃးမႂ်းဝႆႉႁေလႃႈ။ ႁဝ်းလူဝ်ႇပၢႆႈၶဝ်ႈဝဵင်းဢိူဝ်ႈၼၼ်ႉ။ ၶူဝ်းမႂ်းၵေႃႈ သႂ်ႇမႃးၽွင်ႈလႄႈ။ ပေႃးၾႃႉလႅင်းလီလီၵေႃႈ ႁဝ်းဢွၵ်ႇႁိူၼ်းၵႂႃႈ”

ပီႈလူဝ်း ဢၢႆႈငူဝ်ႉၶဝ်ၵေႃႈ ၵႂႃႇသိမ်းတေႉ။ ဢၢႆႈငူဝ်ႉၵေႃႈ ၵႂႃႇတူၺ်း ၵႃးတရီးၵလွင်းမၼ်း။ ထႅမ်ၼမ်ႉမၼ်း ဢၼ်မီးဝႆႉၼႂ်းပုင်းလိူဝ်ၼၼ်ႉ။ ယဝ်ႉၵေႃႈ လွမ်တူၺ်း ႁိမ်းႁွမ်း။ ဢမ်ႇႁၼ်လၢၵ်ႇလၢႆးသင်။ ဢမ်ႇႁၼ်သိုၵ်းသင်။

ၽိူဝ်ႇမိူင်းလႅင်းလီလီယဝ်ႉ ဢၢႆႈငူဝ်ႉၶဝ်ပီႈၼွင်ႉ တၢင်ႇဢဝ် ထူင်ၶူဝ်းထူင်ၽႃႈသေ ဢွၼ်ၵူၼ်းထဝ်ႈ လုၵ်ႈဢွၼ်ႇ တၢင်ႇၼိူဝ်တရီးၵလွင်းသေ ဢွၵ်ႇဝၢင်းႁိူၼ်းမႃး။ ပီႈဢႆၢႈၶဝ် ၵေႃႉႁေႃႈ။ ပႃႈထွၼ်းၶဝ် ပူႇဢွၵ်ႇ ဢၼ်လုၵ်ႈလၢင်းၶဝ် ၵႂႃႇမီးတၢင်းမိူင်းထႆးၼၼ်ႉၵေႃႈ လၢၵ်ႈထူင်ၶူဝ်းၶဝ်ဢွၵ်ႇႁိူၼ်းမႃးလႄႈ ပီႈဢၢႆႈဢၢႆႈငူဝ်ႉၶဝ် ၵိုတ်းၵႃးပၼ်။ ဢၢႆႈငူဝ်ႉၵေႃႈ လူင်းၸွႆႈတေႃႉတၢင်ႇထူင်ၶူဝ်း ပႃႈထွၼ်းၶဝ် ၼိူဝ်ၵႃး။ ပႃႈထွၼ်းၶဝ်ပူႇဢွၵ်ႇၵေႃႈ ၵၢၼ်းၶိုၼ်ႈၼိူဝ်ၵႃး။ ၵူၼ်းဝၢၼ်ႈ ၸိူဝ်းမီးလူတ်ႉၵေႃႈ ၶီႇလူတ်ႉ၊ ၸိူဝ်းမီးထေႃႈၵေႃႈ ၶီႇထေႃႈ၊ ၸိူဝ်းမီးၵႃးၵေႃႈ ၶီႇၵႃးသေ ဢွၵ်ႇႁိူၼ်းၽႂ်ႁိူၼ်းမၼ်း၊ ၵႂႃႇႁူးၽႂ်တၢင်းမၼ်းယဝ်ႉ။ ၸွမ်းတၢင်းၼၼ်ႉ ဢၢႆႈငူဝ်ႉၶဝ် တၼ်းၶိုတ်း ထေႃႈဢေးသူၺ်ႇၶဝ် ပေႃႈမႄႈလုၵ်ႈ။ ၼႃႈဢေးသူၺ်ႇၵေႃႈ ဢမ်ႇလီသေဢိတ်း။ ဝၢႆႇတူၺ်းမႃး တၢင်းတရီးၵလွင်း ဢၢႆႈငူဝ်ႉၶဝ် ၵမ်း႞။ ၸွမ်းတၢင်းၼၼ်ႉ ဢၢႆႈငူဝ်ႉၶဝ် လႆႈႁၼ် ဢၢႆႈၵုၵ်း မီးယူႇတီႈႁူဝ်ဝၢၼ်ႈ။ ဢၢႆႈၵုၵ်းမႃးလႄႇ ဝၢၼ်ႈဢၢႆႈငူဝ်ႉၶဝ်ၵွႆးလႄႈ ဢမ်ႇမီးၽႂ် တၼ်းၶုၵ်းၸႂ်လႆႈ တႃႇႁွင်ႉဢဝ်မၼ်းၵႂႃႇ။ ယွၼ်ႉယၢမ်ႈပဵၼ်တႆးၵေႃႉၵၼ် ၸဵမ်လဵၵ်ႉလႄႈ မိူဝ်ႈထူပ်းၵိၼ်းၼၼ်ႉ ၸႂ်ဢၢႆႈငူဝ်ႉၵေႃႈ ဢမ်ႇယူႇလႆႈ။ ႁႂ်ႈပီႈဢၢႆႈၶဝ် ၵိုတ်းႁေ တၢင်ႇမႃးပႃး ဢၢႆးၵုၵ်း။ ဢၢႆႈၵုၵ်းၵေႃႈ ၸူမ်းတေႉတေႉ။ ၽိူဝ်ႇထၢမ်တူၺ်း “ဢၢႆႈၵုၵ်း ႁဵတ်းသင် မႂ်းဢမ်ႇၶီႇလူတ်ႉမႃးလႃႇ” ၼႆၼၼ်ႉ ဢၢႆႈၵုၵ်း ၶႂ်ႈတွပ်ႇၽွင်ႈ ဢမ်ႇၶႂ်ႈတွပ်ႇၽွင်ႈသေ “ၶမ်ႈဝႃး ၶဝ်သုမ်းၽၢႆႉ၊ လႆႈဢဝ်လူတ်ႉၵဝ် ဢၢပ်ႈပၼ်ပိူၼ်ႈၵႂႃႇ” ၼႆႁိုဝ်ႉ။

ဢၢႆႈငူဝ်ႉ ၶႃဢၢႆႈၵုၵ်း ၸိူဝ်းသူင်သိုၵ်း၊ ႁၵ်ႉသိုၵ်းၼႃႇၼႆႉ မိူဝ်ႈလဵဝ် ၶႃလႆႈပၢႆႈသိုၵ်းယူႇယဝ်ႉ။ ၸုမ်းသိုၵ်းသွင်ၸုမ်း ဢၼ် ဢၢႆႈငူဝ်ႉၶႃဢၢႆႈၵုၵ်း ႁၵ်ႉၽႂ်ႁၵ်ႉမၼ်းၼၼ်ႉ ယိုဝ်းၵၼ်လႄႈ ၶႃလႆႈပၢႆႈသိုၵ်းယူႇယဝ်ႉ။ ဝႃႈတေႉၵေႃႈ ဢၢႆႈငူဝ်ႉ လႆႈပၢႆႈသိုၵ်း မိူဝ်ႈလဵဝ်ၵွႆး ဢမ်ႇၸႂ်ႈ။ မိူဝ်ႈပိူၼ်ႈမႃးၵဵပ်းသိုၵ်း တူၵ်းၺႃးႁိူၼ်းၶဝ် တေလႆႈၵႂႃႇထၢမ်းၵၢၼ်သိုၵ်းၼႆၼၼ်ႉ ပီႈဢၢႆႈၶဝ်သမ်ႉ မီးလုၵ်ႈမီးမေး ဢမ်ႇၸၢင်ႊၵႂႃႇ။ ၵူၺ်းၵႃႈ ဢၢႆႈငူဝ်ႉၵေႃႈသမ်ႉ ဢမ်ႇၶႂ်ႈၵႂႃႇ။ ၼႆလႄႈ မႄႈဢၢႆႈငူဝ်ႉ ၸူၵ်းဢဝ်ငိုၼ်းဢၼ်မၼ်းၵဵပ်းဝႆႉႁွမ်ဝႆႉၼၼ်ႉသေ ႁႃၸၢင်ႈဢဝ် ၵူၼ်းတႅၼ်းတၢင် လုၵ်ႈၸၢႆးမၼ်း။ ၵွပ်ႈၼႆ ၶီႈယႃႈၼႂ်းဝၢၼ်ႈၶဝ် ဢၢႆႈပိုဝ်း ၵႂႃႇထၢမ်းၵၢၼ်သိုၵ်း တႅၼ်းတၢင် ဢၢႆႈငူဝ်ႉသေ ပဵၼ်ၸၼ်ႉသွင်မႆဝႆႉၼႆ ထွမ်ႇဝႃႈတေႉ။ ၸၢင်ႊၵႂႃႇပိူင်ႈသင် ဢၢႆႈၶိၼ်ႇ ၶီႈယႃႈတီႈဝၢၼ်ႈဢၢႆႈၵုၵ်းၶဝ်ၼၼ်ႉၵေႃႈ ဢူႈမႄႈဢၢႆႈၵုၵ်းၶဝ် ၸၢင်ႈလႄႈ ၵႂႃႇမီးဝႆႉ ၼႂ်းၸုမ်းသိုၵ်းၼၼ်ႉယဝ်ႉယိုင်။ မိူဝ်ႈလဵဝ် ၼႂ်းသိုၵ်းသွင်ၽၢႆႇ ဢၼ်မႃးယိုဝ်းၵၼ် တီႈႁိမ်းဝၢၼ်ႈၶဝ်ၼၼ်ႉ ယူဝ်ၶႄးပႃးမႃး ဢၢႆႈပိုဝ်း လႄႈ ဢၢႆႈၶိၼ်ႇ ႁိုဝ်ၵေႃႈ ဢမ်ႇႁူႉ။

ယဝ်ႉယဝ်ႉ။

ၸိူင်းပွတ်း ဢၼ်  ၶမ်းသွင်ႇမိူင်း (ပၢႆၵမ်ၽႄ ၶုၼ်ယုင်းၶဵဝ်) တႅမ်ႈ 

▪️ ယၢမ်ႈပႃးၼႂ်း သႅၼ်ပၢႆး သွႆႉ (7) ၊ မၢႆ (9) ဢၼ်ဢွၵ်ႇမိူဝ်ႈ မၢတ်ႈ 4 ဝၼ်း ၊ 2019 ၊ ဝၼ်းၸၼ် ၊ ၶူတ်းၸႂ်ႉ